Улаанбаатар хотын дундуур урсдаг Туул, Сэлбэ гол орчмыг сайжруулах төслийн нэгжийн урилгаар өнөөдөр БНСУ-ын Инженерийн Барилга байгууламж, технологийн Үндэсний Хүрээлэнгийн эрдэм шинжилгээний ахлах мэргэжилтэн Доктор Сэм-Хи Ли, Сөүл хотын гол дагуух тохижилтыг гардаж хийсэн Усны чиглэлийн инженер, Гачон их сургуулийн Профессор Чой Жон Гуан, Ландшафт архитектур мэргэжлээр Харвардын Их Сургуулийг төгссөн хүндэт доктор Ким Жоун Хүөн, Гавон компанийн захирал, архитектор Санг Хиуон нар болон энэхүү төслийг хариуцан ажиллаж байгаа Б.Цэцэг, Баянзүрх дүүргийн засаг даргын орлогч Б.Батбаяр нарын хамт уулзлаа.

Уулзалтаар Туул, Сэлбэ гол орчмыг сайжруулах төслийн техник, эдийн засгийн үндэслэлийг /ТЭЗҮ/ маш нарийн тооцоо судалгаанд үндэслэн боловсруулахаар ажиллаж байгаа бөгөөд БНСУ-ын ижил төстэй төслүүдийг хэрхэн амжилттай хэрэгжүүлсэн тухай туршлагыг судлан, төслийн зураг төслийг мэргэжлийн байгууллагаар хийлгэх тал дээр хамтран ажиллах талаар ярилцлаа. Сүүлийн жилүүдэд Улаанбаатар хот орчмын агаар дахь тоосжилтын хэмжээ нэмэгдэж, гадаргын ус багасч, хөрсний чийг алдагдаж эвдрэлд орсны улмаас хавар, намартаа шороогоор шуурдаг болоод удаж байгаа.

Туул, Сэлбэ голын усны ундаргыг нэмэгдүүлэх мөн эрэг орчмыг тохижуулах, сайжруулах төслийг амжилттай хэрэгжүүлэх нь хотын агаарын чийгшлийг нэмэгдүүлэх, ногоон байгууламжийг тэтгэх, тоосжилт багасах, цаашлаад иргэдийн ая тухтай амьдрах орчин нөхцөлийг бүрдүүлэхэд чухал ач холбогдолтой төсөл юм.

Сэтгүүлч

Сэтгүүлч Ц.Соёлмаа soyolmaa@vip76.mn