Авлигатай тэмцэх газраас “Мал амьтны гаралтай түүхий эд, бүтээгдэхүүнийг экспортлоход тулгарч буй асуудал-Цахимжуулалт, гарц шийдэл” сэдэвт хэлэлцүүлгийг зохион байгууллаа.

Авлигатай тэмцэх үндэсний хөтөлбөрийн 2.1.2-т “Төрийн үйлчилгээний нээлттэй байдлыг хангаж, цахим үйлчилгээг хөгжүүлэх, чанар хүртээмжийг сайжруулах, үйлчлүүлэгчийн эрх ашгийг дээдэлж, төрийн албан хаагчийн хариуцлагыг дээшлүүлэх” зорилт тусгагдсан байдаг.

Энэ хүрээнд хөдөө аж ахуйн гаралтай түүхий эд, бүтээгдэхүүний экспортыг нэмэгдүүлэх, төрийн байгууллага хоорондын нэг цонхны үйлчилгээг уялдуулах, мэдээллийн урсгалыг сайжруулах, төрийн үйлчилгээг иргэн, аж ахуй нэгжүүдэд түргэн шуурхай, ил тод хүргэх, хүнд суртал, чирэгдлийг арилгахад тус хэлэлцүүлгийн зорилго оршсон билээ.

Эл хэлэлцүүлгээр Монгол улсын мал амьтны гаралтай бүтээгдэхүүний экспортын үйл ажиллагаанд тулгамдаж буй өнөөгийн асуудал, хил гаалийн хорио цээрийн хяналт, экспортын лицензийг цахимжуулах бодлого, экспортыг сайжруулах чиглэлээр салбар бүрийн төлөөллүүд нээлттэй санал, бодлоо хэлэлцэж гарц шийдлийг тодорхойлов. Ингэхдээ холбогдох харьяа байгууллагаас авч хэрэгжүүлж буй арга хэмжээ, цаашид хийх төлөвлөгөө, зөвлөмжийг танилцуулсан юм.

Хэлэлцүүлэгт Хүнс хөдөө аж ахуй, хөнгөн үйлдэрийн яам, Цахим хөгжил, харилцаа холбооны яам, Гаалийн ерөнхий газар, Мал эмнэлгийн ерөнхий газар, Улсын мал эмнэлэг, ариун цэврийн төв лаборатори, төрийн цахим үйлчилгээний нэгдсэн систем "E-Mongolia"-ын төлөөллүүд оролцлоо.