Донорын тухай хуулийн нэмэлт өөрчлөлтөөр хүний амь нас аврах үнэтэй үйл хэрэгт оролцож буй доноруудын эрх, ашигт нийцсэн хэд хэдэн зохицуулалтыг тусгалаа.

Өмнөх хуулиар зөвхөн 25 нас хүрсэн иргэн эрхтэнээ бусдад шилжүүлж болох зохицуулалттай байсан бол шинэ хуулиар 21 нас хүрсэн иргэн сайн дурын үндсэн дээр “Донор” болох боломжтой боллоо.

Эд, эс, эрхтэн шилжүүлэн суулгадаг дэлхийн ихэнх улс орнуудын донорын нас нь 18 байдаг. Донорын насыг 21 болгосноор гэр бүлдээ донор болох боломжтой иргэдийн тоо нэмэгдэж, гадагшаа гарах мөнгөн урсгал зогсох, эмчлүүлэгчийн амь насыг аврахад хугацаа алдахгүй байх олон давуу тал бий болж байна.

Нэмэлт өөрчлөлтөөр

• Амьд донорууд жилд нэг удаа дотоодын рашаан сувилалд үнэ төлбөргүй сувилуулна
• Цусны донор болон эс, эд, эрхтний амьд донорыг олон нийтэд таниулах, алдаршуулах үйл ажиллагааг явуулна
• Амьгүй донор болон гэр бүлд хүндэтгэл үзүүлэх арга хэмжээг зохион байгуулахаар боллоо.
• Эс, эд, эрхтний донорын нэгдсэн бүртгэл, мэдээллийн санг байгуулахаар болов.

Монгол Улсын Их Хурлын гишүүн Ж.Чинбүрэн

25-аас доош насныхныг донор болгодоггүйн улмаас элэг, бөөр, үүдэл эс, чөмөг шилжүүлэн суулгахад хүндрэл учирдаг. 21 настай залуу аавдаа элэгний донор болж чадалгүй алдаж байсан гашуун тохиолдол бий. Мөн 21-24 настай залуучууд аав ээжийгээ аврахын тулд заавал гадаад руу явж хагалгаа хийлгэх, эд эрхтэн шилжүүлэн суулгах шаардлагатай болдог байсан. Энэ зүйл өөрчлөгдлөө.

• Америкийн Нэгдсэн Улс
• Турк
• Энэтхэг улсад 18 настай иргэн
• Сингапур улсад 21 настай иргэн сайн дурын үндсэн дээр донор болдог.