Сонирхлоо дагаж түүнийгээ ажил болгон дэлхийн стандартыг Монголдоо шингээж, шинэ соёлыг түгээж яваа залуу үеийн чадварлаг төлөөлөл “Jangsu Korean Steak house”-ийн гүйцэтгэх захирал Т.Золзаяаг уншигчдадаа танилцуулж байна.

Энэ салбарт хүч сорьж гараагаа эхэлсэн түүх минь их энгийн. Би багаасаа хоол хийх сонирхолтой, хаана амттай хоол байгаа бол гэж хайж, судлан очдог байлаа. Нөхөртэйгөө танилцаж, үерхэж эхэлсэн цагаас өөрийн гэсэн ресторантай болох мөрөөдөлтэй байв. Бид хоёр Европын олон улсаар ажлаа хийнгээ, амардаг.

Ингэхдээ тухайн улсын музей, түүхэн дурсгалт газраас илүүтэй ресторануудаар нь орж хоол идэн, хоолны талаар судалж ихэнх цагаа өнгөрүүлдэг. Үндэстэн бүрийн хоол нь өвөрмөц, соёлоороо ялгарч байдаг. Тиймээс очсон улсдаа аялж байгаа биш амьдарч байгаа юм шиг л байж хоолны соёлыг нь ихэд сонирхдог юм. Гадны улсаар явж байгаад Монголдоо ирэхэд манайд олон улсад нийцсэн өндөр зэрэглэлийн ресторан төдийлөн байхгүйг анзаарсан.

Иймд мөрөөдлөө бодит болгохоор БНСУ-ын франчайзыг “Brussels Belgian Beer Café”-г үүсгэн байгуулагч Э.Итгэл, Итали улсын Милан хот дахь хамгийн эрэлттэй Солонгос хоолны ресторанд ахлах тогоочоор ажиллаж байсан үеэл дүү Т.Баттөмөр нартайгаа хамтран оруулж ирсэн. Ковидын нөхцөл байдлаас шалтгаалан рестораны маань засварын ажил 7-8 сар үргэлжилсэн. Хил хаалттай, бараа бүтээгдэхүүний үнэ өссөн, хөрөнгө оруулалтын төсвөөсөө хэтэрсэн зэргээр хүнд цаг үед ажлаа эхлүүлж байлаа.

Орчин үеийн интерьерийн шийдлийг байгалийн материалуудаар чимсэн нь гоо зүйн таашаалыг сэтгэлийн тав тухтай байдалтай хоршуулан танд мэдрүүлнэ.

120 хүний суудалтай 3 vip өрөөтэй

Интерьер, дизайны санаагаа нөхөртэйгээ гаргаж, гүйцэтгэл дээр Италийн алдарт iGuzzini illuminazione компанийн Монгол дахь албан ёсны түнш “Азура Архитектс” компанитай хамтран ажилласан. Ерөнхий дотоод засал, дүр төрхөө Солонгос улсын эртний уламжлалт архитектур “Wabi Sabi” буюу “Төгс бус гоо үзэсгэлэн”-гээр бүрдүүлсэн. Байгалийн бүтээгдэхүүнийг орчин үеийн гэрэл, чимэглэлтэй хослуулснаараа онцлогтой.

Миний судсаар үйлчилгээ, зочломтгой байдал урсаж байдаг.

Миний хувьд Солонгос улсад 11 жил амьдарсан. Солонгосчууд эрт цагт ядуу, буурай байх үедээ өлсөж, цангасан хүнд амьдралыг туулсан. Хоолны соёл нь гайхалтай нэг навчийг ч хоол болгож чаддаг аж ахуйч орон. Тэд үхрийн махаа их дээдэлдэг. Мах нь үнэтэй учраас зөвхөн баяр ёслолын үеэр хүндтэй хүндээ үхрийн мах бэлэглэдэг, дайлдаг. Солонгост 7,8 жилийн өмнөөс “Хану” үхрийн махыг дарстай хослуулан хэрэглэх шинэ соёл хөгжиж эхэлсэн.

Хэсэг тус бүр нь өндөр үнээр үнэлэгдэх дэлхийд алдартай “Хану” үхрийн мах

Энэ соёлыг олон нийтэд таниулахаар хичээн ажиллаж байна. Чолла аймгийн Жансу муж нь Солонгос улсдаа “Хану” үхэр болон алимаараа алдартай. Энд бойждог “Хану” үхрийн мах нь дэлхийн стейкны махны эхний 10-д багтах өндөр зэрэглэлийх. Байгаль нь зурсан зураг мэт үзэсгэлэнтэй, малын тахал өвчин нэг ч удаа гарч байгаагүй, үйлдвэржилтгүй, онгон байгалиараа бүс нутаг. Ийм нутагт тусгай аргаар өсгөсөн “Хану” үхрийн махны шим тэжээлийг нь алдагдуулахгүйгээр эх орондоо тээвэрлэн авч ирж байна. Ингэхдээ огт хөлдөөхгүйгээр шүүслэг хэвээр нь хөргөгчид хадгалдаг. Хадгалах хугацаа нь 14-28 хоногоос хэтэрдэггүй

Үүнээс эрүүл, аюулгүй, чанарын баталгааг харж болно. Дэлхийд амт, чанараараа дээгүүр эрэмбэлэгддэг уг махаар рестароныхаа бүх хоолыг хийдэг. Үүгээрээ бусад газруудаас ялгарч байгаа юм. Мөн манай хоолны амт хэзээ ч өөрчлөгддөггүй. Энэ нууц нь мастер тогооч И Сан Гү-тэй салшгүй холбоотой. Тэрээр өмнө нь Солонгосын Мишелиний одтой Гомтан /Gomtang/ шөлний газарт ажиллаж байсан чадварлаг тогооч. Түүний хүсэл зориг нь мөн “Хану” махыг дэлхийд таниулах билээ. Хоолондоо хурц амтлагч хийдэггүй. Орц бүрийн амтыг өөрөөр нь гаргадаг.

Шүүслэг, өөх махны тэнцвэртэй, уургаар баялаг "Хану" мах

Дээрээс нь бид гол бүтээгдэхүүнүүдээ бүгдийг нь Жансу мужаас авдаг. Кимчи гэхэд яг энэ мужаас ирсэн байдаг. Кимчинд орж байгаа улаан чинжүүний нунтаг нь хүртэл тэндээс ирж байгаа. Бусад үйлчилгээний газар хүнсний ногоо болон хоолны материлаа 7 хоногоор нөөцлөн авдаг бол бид хүнсний ногоогоо өглөө бүр шинээр нь татдаг. Энэ махаар хоол хийдэг газар Солонгост цөөхөн байдаг. Тиймээс Ази тивд өрсөлдөх хэмжээний төгс үйлчилгээ, эрүүл чанартай хоол хүнсийг дэлгэрүүлэх нь миний хүсэл.

"Үйлчлүүлэгчдээ дээд зэргийн үйлчилгээг хүргэж хоолны соёлыг тултал нь мэдрүүлэхийг яс барьж ажиллахыг хичээдэг"

Дэлхийн олон улсаар аялж, ажиллаж, амьдарч ирсэн хүмүүс Монголдоо ирээд олон улсын стандартад нийцсэн үйлчилгээг өөрийн эрхгүй хүсэж байдаг. Тиймээс дэлхийн хэмжээний үйлчилгээний стандартыг хүргэхэд өөрөөрөө үлгэрлэж баг хамт олноороо зүтгэж байна. Манай ресторан 15:00-18:00 цагийн хооронд амардаг онцгой хуваарьтай.

Энэ цагаар ажилчид маань амрахаас гадна зөв цагт хоол идэх соёлыг үйлчлүүлэгчдэдээ түгээж байна. Өдөр болон оройн хоолоо зөв цагт идэх нь чухал гэдгийг хүмүүс мэдэх хэрэгтэй. Европын улсууд тэр дундаа Итали, Францад дотны хүнтэйгээ 4-5 цаг яриа өрнүүлэн хоолоо иддэг. Харин манайд ийм зүйл байдаггүй. Хоолоо яаран иддэг, хоолны цагийн соёлгүй, хүссэн цагтаа иддэг. Дундын цагт хооллодгоос буруу хооллолт үүсэж байгаа юм. Хоолоо гагцхүү өлсөх мэдрэмжээ дарж, цадах гэж идэх биш бүх мэдрэмжээрээ амталж, ажааралтай таалан хүртэх нь соёл юм.

Солонгос улсын эртний уламжлалт архитектур “Wabi Sabi” буюу “Төгс бус гоо үзэсгэлэн”-ээр дүр төрхөө бүрдүүлсэн.

Дэлхийн үйлчилгээг хоолны соёлтой төгс мэдрүүлнэ

Дэлхийн үйлчилгээг хоолны соёлтой төгс мэдрүүлнэ