Элэг нэгт Монгол ахан дүүсээ “Сайжруулагч” хэмээх усан бар жил улирч "Үзэсгэлэн болгогч" хэмээх харагчин /усан/ туулай жилийн Хаврын тэргүүн сар айлчлан ирлээ.

Улс эх орныхоо, Улаанбаатар хотынхоо хөгжил дэвшилд хувь нэмрээ оруулж ирсэн ахмад буурлууд, одоо цагийн түүхийг бүтээж байгаа идэр залуус, ирээдүй болсон хүүхэд багачууд та бүхэндээ сар шинийн мэндийг өргөн дэвшүүлье. Цагаан сар бол айсуй өдрүүдийн тэгш дүүрэнг бэлэгддэг, өвөг дээдсээс уламжилсан монгол түмний давтагдашгүй өв соёл билээ.

Тиймээс өлзийт жилийн ерөөл билиг хэлэлцэн, өвөг дээдсээ хүндэтгэн золгодог уламжлалтай. Улирч буй усан бар жилд нутгийн өөрөө удирдах ёсны байгууллагыг төрийн удирдлагатай хослуулан хөгжүүлэх эх үндсийг тавьсны 30 жилийн ой тохиолоо. 30 жил гэдэг хүний амьдралд багагүй цаг хугацаа. 30 жил гэдэг хүн төрөлхтөн, улс үндэсний түүхэн цаг хугацааны хувьд асар богинохон үе.

Нутгийн өөрөө удирдах шинэ ардчилсан тогтолцооны 30 жилд нийслэлийн иргэдийнхээ эрхэм дээд шийдвэр, эрх чөлөөт сонголтоор, иргэдээ төлөөлж, дуу хоолой, хүсэл зориг, эрх ашгийг нь илэрхийлэн хамгаалж, бататган хангахын төлөө үзэл бодол, мэдлэг оюунаа уралдуулан өрсөлдүүлж, цөөнхөө хүндэтгэж, олонхоороо шийдвэрлэж ирсэн Монголын ардчилал, Монголын нутгийн өөрөө удирдах ёсны нэн шинэ түүх, эрх чөлөөний ололт билээ.

Нутгийн өөрөө удирдах ёсны байгууллага бол иргэд нь төлөөлөгчөөрөө дамжуулан төрийн эрхийг барьж буй сонгодог хэлбэр.
Тийм ч учраас улсын хөгжлийн толь болсон Улаанбаатарынхаа хөгжил дэвшил, хотын иргэдийнхээ эрх ашиг, хүсэл зоригийн төлөө Нийслэлийн иргэдийн Төлөөлөгчдийн Хурлын энэ удаагийн бүрэлдэхүүн ухаан бодлоо уралдуулж, улам ихээр хичээн зүтгэн ажиллах болно.

Үзэсгэлэн болгогч хэмээх харагчин туулай жилдээ улс, нийслэл маань улам хөгжиж, түмэн олон минь амар амгалан сайхан жил байхыг билгэдэн ерөөе. Сар шинэдээ сайхан шинэлээрэй.

"Үзэсгэлэн болгогч" хэмээх харагчин туулай жилийн хаврын тэргүүн сар айлчлан ирлээ