УИХ-ын хаврын чуулганы /2023,03,17/-ны өдрийн хуралдаанаар Ерөнхий сайдын мэдээлэл: Мал сүргийн хаваржилт, хаврын тариалалтын бэлтгэл хангах, нөөцийн мах худалдаалах арга хэмжээний талаар сонслоо.

Эл асуудалтай холбогдуулан гишүүд өөрсдийн байр сууриа илэрхийлэв.

УИХ-ын гишүүн Ц.Туваан:

Цаг үеийн асуудал орж ирж байна. Хаврын урт шар дээлтэй хүн ирсэн цаг үе эхэлж байна. Зудтай сумдууд дээр үхэл эхэлж байна. Энэ жил онцгой хүйтэн байсан. Дээрээс нь Төв аймгийн зүүн урд талын сумдууд их зудын хүнд байдалд өвөлжсөн. Зудын нөхцөл байдлаас гараад одоо жинхэнэ мал ядардаг цаг эхэлсэн. Үүнтэй зэрэгцэж өвсний үнэ хорин мянга, ногоон тэжээлийн үнэ 25 мянган төгрөг гарсан. Энэ дээр ямар бодлого байна вэ? Малаа тэжээх өвсгүй болчихсон байгаа малчдад өвс тэжээлийн үнэ том дарамт болж байна.

Хаврын тариалалт эхлэх гэж байна. Тойрогтоо ажиллахад маш олон иргэд хэлсэн. Засгийн газраас газар тариалангийн салбарт том бодлогуудыг хэрэгжүүлж байна. Тухайлбал үнэ тогтворжуулах хууль, гурилын үйлдвэрүүдэд  нэн хөнгөлөлттэй зээл өгч байхад зэрэгцээд гурилын үнэ нэмэгдэж байна гэдэг асуудлыг маш ихээр хэлсэн. 25кг-ийн шуудайтай гурил 60.000, 50кг-ийн гурил 110 мянга гарчихлаа. Цалин тэтгэвэр дорвитой нэмэгдээгүй энэ цаг үед ийм нэмэгдлүүд орж ирээд байна. Үүн дээр ямар бодлого барих вэ гэсэн асуултуудыг Төв аймгийн бүх сумдаас ирүүлсэн.  

Хүнсний ногоон дээр БОХХАА-н байнгын хороонд тогтоол гаргаж, Засгийн газар луу хүргүүлсэн. Бүх сумдад 10 га түнээс дээш хэмжээний газар бий болгож хүнсний ногоо, жимс жимсгэнэ, мод бут тарих ажлыг эхлүүлье гэсэн шийдвэр гарсан. Үүний дагуу ямар ажлуудыг хийж байна вэ?

Монгол улсын Ерөнхийлөгчийн санаачилгаар хэрэгжиж буй “Хүнсний хангаж аюулгүй байдлыг хангах” тогтоолын төслийн дагуу 1 их наяд төгрөгийн зээлийг ярьсаар байтал цаг хугацаа тулаад ирлээ. Энэ дээр банк нь шалгарсан уу. Хүүг хэдээр тохирсон, яаж өгөх гэж байна вэ?

Борнуурын сангийн аж ахуй бол улсын хэмжээний төмс хүнсний ногооны 70 хувийг хангадаг байсан, тэр дундаа Төв аймгийн голлогч хүнсний ногоо тариалагч сум. Үүнийг одоо шийдэхгүй бол услалжуулалтын системийн барилгад асуудал үүсвэл Монгол улсын хүнсний ногооны нийлүүлэлт дээр сөрөг нөлөөтэй. Үүн дээр ямар арга хэмжээ авч байна вэ?

Түүний асуултад ХХААХҮ-ийн сайд Х.Болорчулуун хариуллаа.