УИХ-ын /2023,03,23/-ны өдрийн чуулганаар Төрийн байгуулалтын байнгын хорооны даргыг сонгох тухай хэлэлцлээ.

Уг асуудалтай холбогдуулан гишүүд байр сууриа илэрхийллээ. 

УИХ-ын гишүүн Ц.Туваан

Төв аймгаас сонгогдсон хашир, туршлагатай Нямаагийн Энхболд гишүүнийг Төрийн байгуулалтын байнгын хорооны даргаар сонгохоор орж ирж байна. Үүнийг дэмжиж байгаа. Нэг асуулт асууя. Өнгөрсөн жил Үндэсний их баяр наадмын тухай хууль Төрийн байгуулалтын байнгын хороогоор орж, хэлэлцэгдэж шийдэгдсэн. Энэ хууль хэрэгжээд явж буй. Чуулганы завсарлаганаар орон нутагтаа ажиллаад ирсэн. Энэ үеэр бүх сумд Үндэсний их баяр наадмын тухай хуульд өөрчлөлт оруулж өгөөч гэсэн асуудлыг хэлсэн. Ямар өөрчлөлт вэ гэхээр баяр наадмын хурдан морины уралдаанд “Хаврын уралдаан”-ы талаар оруулж өгөөч хэмээсэн.

Энд байгаа гишүүдийн 52% нь хөдөө орон нутгаас сонгогдсон. Малчид, уяачид өвөл, хаваржингаа морио тэжээгээд, бэлддэг. Туслах уяачид, уралдаанч хүүхдүүд, хүнс тэжээл гээд нэлээн зардал гаргадаг.

Хаврын уралдааныг хориглосноос болж олон газар нууц уралдаанууд болж байна. Сумын захиргаа, эмнэлэг, цагдаагийн хүмүүст мэдэгдэхгүй нууцаар уралдаан зохион байгуулж буй талаар иргэд хэлсэн. Энэ хэрээр эрсдэл дагуулж байгаа. Үүнд төр зохицуулалт хийж өгөөч. Таны хувьд УИХ-ын гишүүн, орон нутгаас сонгогдсон гишүүдийн хамтаар энэ хуульд нэмэлт өөрчлөлтийн төсөл санаачилж оруулж өгөөч гэсэн хүсэлтийг ихээр уламжилсан.

Эрсдэлийн хувьд зуны наадмын уралдаан хавраас зай нь хол байдаг. Хувцас хэрэглэл хөнгөн, морины хурд хүртэл их болдог.  Н.Энхболд гишүүн байнгын хорооны даргын хувиар Үндэсний их баяр наадмын тухай хуульд уг асуудал орж ирвэл ямар байр сууриас хандах вэ.

Түүний асуултад УИХ-ын гишүүн Н.Энхболд хариуллаа.