Өнөөдөр авто замын зураг төсвөөс авахуулаад магадлал, зам ашиглалт, судалгаа шинжилгээ гээд замтай холбоотой бүхий л асуудлыг хариуцах чиг үүрэгтэй Зам Тээврийн Хөгжлийн төвд ажиллалаа.

Өнгөрсөн хугацаанд манай улс 7400 км хатуу хучилттай авто замтай болж, 21 аймаг, 110 гаруй сум суурингаа холбоод байна. Одоо бид шинээр зам барихаас илүүтэй байгаа замынхаа засвар арчлалтыг илүү сайжруулах, даац хэтрэлтээс үүдэлтэй эвдрэл гэмтлээс сэргийлэх нь илүү чухал.

Нэн түрүүнд нийтийн зориулалттай замаар даац хэтрүүлэн эвдэж, зам ашиглагчийн 95 хувийг эзэлж буй иргэдийнхээ амь нас, эрүүл, мэнд, эд хөрөнгөөр дэнчин тавьж болохгүй.

21-р зуун гарчихаад байхад 20-р зууны стандарт, норм нормативаар зам гүүрийн барилга байгууламж барьж таарахгүй. Тиймээс авто замын салбарын эрдэм шинжилгээ судалгааны ажлын чанарыг сайжруулж ЧАНАРТАЙ ЗАМ БАРИХ, ЧАНСААТАЙ ЗАСВАР АРЧЛАЛТ хийх нь эн тэргүүний зорилт.

Энэ онд баригдах 540 км авто зам, 500 метр гүүрийн ажлыг хийж гүйцэтгэхэд энэ л зарчмыг баримтална. Авто замын сангийн орлогыг нэмэгдүүлж, зарцуулалтыг ил тод болгож, төлбөр авах цэгүүдийг бүрэн цахимжуулж, зам гүүрийн барилга байгууламжийн хяналтыг шилэн болгоно.