Сонгинохайрхан дүүргийн хороо тус бүрт хийж байгаа бүтээн байгуулалтыг эрчимжүүлэх, иргэдээс ирсэн санал, гомдлыг шийдвэрлэхээр дүүргийн Засаг дарга Н.Алтаншагай хоёр дахь өдрөө Толгойт бүсэд ажиллаж байна.

Өнөөдөр дүүргийн 1, 34 дүгээр хороодод ажиллаж, нөхцөл байдалтай газар дээр нь танилцан, дүүрэг, орон нутгийн зүгээс шийдвэрлэх боломжтой зарим асуудлыг газар дээр нь шийдэж, харьяа яам, агентлагаас удаашралтай байгаа хөрөнгө оруулалтыг тодруулахаар боллоо.

Тухайлбал, нэгдүгээр хорооны хуучин барилгыг шинэчлэн засварлаад тухайн бүсийн иргэдэд зориулан “ЖДҮ эрхлэгчдийн хөгжлийн төв”-ийг байгуулах шийдвэрийг дүүргийн Засаг дарга гаргалаа. Тус төвд өрхийн үйлдвэрлэл эрхлэгчдийг дэмжих, оёдол, эсгүүр, модон, төмөр эдлэл, арьсан эдлэлийн сургалт зэрэг иргэд рүү чиглэсэн бодит ажлыг явуулах юм.

Толгойт дэд төв нь дүүргийн 1, 2, 20, 22, 34, 35 дугаар хороодын 153.4 га газрыг хамрах бөгөөд цэвэр усны шугам, дулаан хангамжийн шугам сүлжээ, авто зам, цэцэрлэг, олон нийтийн хөгжлийн төв, эрүүл мэндийн төв зэрэг инженерийн дэд бүтцийн болон нийгмийн барилга байгууламжийг цогцоор нь шийдвэрлэсэн  томоохон бүтээн байгуулалт болж байна.

Тухайн дэд төв ашиглалтад орсноор Толгойт бүсийн айл өрхийг инженерийн шугам, сүлжээнд холбох, орон сууцжуулах төслүүд хэрэгжих нөхцөл бүрдэнэ.

34-р хороонд 200-250 хүүхдийн хүчин чадалтай улсын хоёр цэцэрлэг 90 гаруй хувьтай үргэлжилж байна. Барилга угсралтын ажлыг эрчимжүүлэн хурдан дуусгах, цэцэрлэгүүд рүү орох орц, гарцын асуудлыг шийдвэрлэхийг газрын албаны нэгдүгээр хэлтэст үүрэг болов.

Мөн 34-р хороонд “Усан спорт сургалтын төв” баригдаж байгаа бөгөөд 2022 оны 5 дугаар сарын 30-нд шавийг тавьж байсан. Энэхүү усан спорт сургалтын төв нь нэг давхартаа 25 метрийн урттай таван зам бүхий бассейн, хоёр давхартаа боулингийн 3 замтай, фитнесийн өрөөтэйгөөр олон улсын стандартад нийцсэн орчин үеийн спортын ордон баригдаж байна. Тус төвийг 2024 онд ашиглалтад оруулахаар төлөвлөн ажиллаж байна.