Монгол Улсын Засгийн газраас иргэд, хуулийн этгээдийн тоон гарын үсгийн хэрэглээг дэмжиж, түүнийг ашиглан төрийн үйлчилгээг авах боломжийг бүрдүүлэх бодлого баримталж, төрийн үйлчилгээг цахим хэлбэрт шилжүүлэх арга хэмжээг үе шаттайгаар хэрэгжүүлж байгаа билээ.

Үүний нэгэн том жишээ нь 2022 онд “Дэлхийн банк”-ны Олон улсын хөгжлийн ассоциацитай хамтран хэрэгжүүлж буй Ухаалаг засаг төсөл юм.

Тус төслийн нэгдүгээр үе шат болох “Ухаалаг засаг-1” төслийг 2022 онд амжилттай хэрэгжүүлэн дууссан бөгөөд Төрийн үйлчилгээний нэгдсэн платформ системд төрийн 68 байгууллагын 789 үйлчилгээ, хөдөө орон нутагт 1,284 үйлчилгээг цахим хэлбэрт шилжүүлж, Ухаалаг газрын харилцааны системийг идэвхжүүлэн 103 мянга гаруй иргэнд үйлчилгээг цахимаар хүргүүлсэн.

Монгол улсын Засгийн газрын хэрэгжүүлэгч агентлаг Улсын бүртгэлийн ерөнхий газар нь Төрийн цахим үйлчилгээний нэгдсэн систем /www.e-mongolia.mn/-ээр дамжуулан 22 төрлийн лавлагаа, 68 төрлийн үйлчилгээг үзүүлж байна.

Цаашид төрийн цахим үйлчилгээний дэд бүтэц болох үндсэн болон дэмжих системийг өргөтгөн хөгжүүлж, бүх шатны төрийн байгууллагыг холбох, дундын үүлэн шийдлийг нэвтрүүлж, Үндэсний дата төвийн хүчин чадлыг нэмэгдүүлэн, мэдээллийн технологийн дэд бүтцийг иж бүрнээр нь шинэчлэн, тоон гарын үсгийн хэрэглээг нэмэгдүүлж, кибер аюулгүй байдлыг хангах, дижитал эдийн засгийн өсөлтийг дэмжих зорилгоор “Ухаалаг засаг -2” төслийг хэрэгжүүлэхээр болж байна.

Тус ажлын хүрээнд Улсын бүртгэлийн ерөнхий газрын удирдлагууд 2023 оны 03 дугаар сарын 30-ны өдөр тус төслийн удирдагч “Сайоу Чью Күек” тэргүүтэй төлөөлөгчдийг хүлээн авч уулзан төслийн талаар санал солилцлоо.

“Ухаалаг засаг -2” төсөл хэрэгжинэ