УИХ-ын 2023,04,27-ны өдрийн хуралдаанаар Монгол Улс дахь хүний эрх, эрх чөлөөний байдлын талаарх 22 дахь илтгэлийг хэлэлцлээ.

Уг асуудалтай холбогдуулан гишүүд асуулт асууж, байр сууриа илэрхийллээ.

УИХ-ын гишүүн С.Бямбацогт:

Эмэгтэйчүүдийн эрх, жендерийн тэгш байдал, төрийн албан хаагчийн эрх, ахмадын, хэвлэл мэдээллийн эрх чөлөө гээд олон асуудлыг ярьж байгаа. Энд хамгийн их ярих, анхаарах ёстой асуудал хаягдчихаад байгаа юм. Хувийн хэвшлийнхний эрх, эрх чөлөө татвар төлөгчид, баялаг бүтээгчид, ажил олгогчдын асуудал орхигдсон. Тэр хүмүүс мөрөөрөө татвар төлдөг, баялаг бүтээдэг, ажил олгодог. Түүнээс төрийн алба хаагч, ахмадууд, эмэгтэйчүүд, хүүхдүүд бүгдээрээ хүртээд явдаг. Цалин, хүүхдийн мөнгө, тэтгэвэрээ авдаг. Төрийн эмнэлэг, сургууль бүхий л зардал тэндээс гарч байдаг. Гэтэл тэднийг хүн болгон шоовдорлодог, дээрэлхдэг. Улс төрч, хууль хяналтынхан, хэвлэл мэдээллийнхэн дээрэлхдэг. Энэ хүмүүсийн эрхийг яах вэ. Тэр хүмүүс Монголд төртэй холбоотой юм хийж болохгүй байна, улс төрчид, хэвлэл мэдээлэл, төрөөс хол байх юмсан гээд үнэхээр хэцүү байдалд буй.

Эдгээр хүмүүсийн эрх ашгийг хэн хамгаалах юм бэ? Эрх ашиг нь хөндөгдөөд байгааг ХЭҮК яагаад олж харахгүй байна вэ. Уг асуудалд ямар бодлого барьж, цаашдаа яах юм бэ?

Хэвлэл мэдээлэл захиалгатай, төлбөртэй, хүн гүтгэдэг, худал мэдээлэл тараадаг шантаажилдаг сэтгүүлч нэртэй нөхдүүд байна. Шударга, хуулийн хүрээнд үйл ажиллагаа явуулдаг сэтгүүлчид тэднийг сэтгүүлч гэж битгий хэлээч, салбарын нэр хүндийг унагааж, гутааж байгаа гэж ярьдаг. Энэ хэдэн нөхдийг яах ёстой юм. Эд нар чинь бүүр хаданд гарлаа. Хаа сайгүй хүн гүтгээд, худал мэдээлэл тарааж байдаг. Захиалгыг нь хулгай хийдэг улс төрчид өгч байгаа байхгүй юу. Хулгайч хулгайчийг нь бариарай гээд баахан хашхирдаг. Бүгд хулгайч болчихсон.

УИХ-ын 76 хулгайч. Засгийн газрын сайд нар бүгд хулгайч. Төрийн албаны хаагчид бүгд хулгайч. Яагаад гэвэл өөрөө баригдахгүйн тулд бүгдийг хулгайч болгож зарлуулдаг, зарладаг, захиалга өгдөг, мөнгө төлдөг.  Эцэст нь төрийн нэр хүнд унадаг. Төрд итгэх ард түмний итгэл алдардаг. Энэ асуудлыг яаж шийдэх вэ?

Түүний асуултад ажлын хэсгийн гишүүд хариуллаа.