УИХ-ын гишүүн Ц.Идэрбат ҮХНӨ-ийн асуудлаар Хэнтий аймагт ажиллаж буй. Энэ үеэр аймагт өрнөж байгаа бүтээн байгуулалтын ажилтай танилцлаа.

“Хан Хэнтий - 100 жил, барилга, бүтээн байгуулалт" хэлэлцүүлэг Хэнтий аймагт зохион байгуулагдсан. Тэрээр энэхүү хэлэлцүүлэгт цахимаар оролцож, барилгын ажлыг чанаргүй гүйцэтгэсэн, хугацаандаа ажлаа хийгээгүй компаниас татгалзаж, “Хар жагсаалт”-д оруулах, татвар төлөгчдийн мөнгийг үрэн таран хийж, “Балгас” болгохгүй байхад анхаарч ажиллахыг хүслээ.

Түүний хувьд аймгийн Засаг даргаар ажиллаж байхдаа дээрх зарчмыг баримталж, 4 компаниас татгалзах саналыг холбогдох яамдад хүргэж, Хан Хэнтий чуулгын барилгын гүйцэтгэгч “Макс майнд” ХХК-аас татгалзаж, улмаар гурван шатны шүүхээр шүүхдэлцэж ялалт байгуулж, дараагийн гүйцэтгэгч орсон юм.

Орон нутагт тулгамдаж буй бэрхшээл, улсын төсвийг үрэн таран хийдэг энэ байдлыг таслан зогсооход анхаарч УИХ-ын чуулганаар нөхцөл байдлыг удаа дараа хэлж, саналаа уламжилж байна. Энэ байдлыг зогсооход захиалагчийн хяналтаас гадна иргэний хяналт чухал үүрэгтэйг онцлов.