2023.05.18
Шивээхүрэн-Сэхэ чиглэлийн холболтын төмөр замын ажил энэ сард эхэлнэ
Засгийн газрын ээлжит хуралдаанаар баруун босоо буюу Шивээхүрэн-Сэхэ чиглэлийн төмөр замын бүтээн байгуулалтыг гүйцэтгэх эрхийг Нарийнсухайтын төмөр зам ХХК-д олгохоор шийдвэрлэлээ.
Бүтээн байгуулалтын ажлыг энэ 5 дугаар сардаа эхлүүлж, энэ оны 10 дугаар сарын сүүлээр ашиглалтад оруулахаар төлөвлөж байна.
Энэхүү гол төмөр замын нийт урт нь 7 км, салаа төмөр зам нь 20 орчим км байх юм.
Хувийн хэвшлийн 200 тэрбум гаруй төгрөгийн хөрөнгө оруулалтаар энэ төмөр замыг барьж, 6 жилийн хугацаанд ашигласны дараа Монголын төмөр зам компанид 100 хувь төлбөргүй шилжүүлж өгөх нөхцөлтэй юм.
Одоогийн байдлаар баруун босоо төмөр зам буюу Арцсуурь-Нарийнсухайт-Шивээхүрэн чиглэлийн 1250 км төмөр зам барих сонгон шалгаруулалт дууссан. Барилга угсралтын ажлыг энэ оны гуравдугаар улиралд багтаан эхлүүлэхээр төлөвлөөд байна.
Мөн Гашуунсухайт-Ганцмод чиглэлийн мухар төмөр замын холболтын төмөр замыг барих ТЭЗҮ боловсруулах сонгон шалгаруулалт явуулж, БНХАУ-ын Төмөр замын 2-р товчоо шалгараад байна.
Түүнчлэн, зүүн босоо чиглэлийн Хөөт-Бичигт-Зүүнхатавч чиглэлийн 426 км төмөр замын барилга угсралтын ажлыг эхлүүлэх гэрээг ирэх 6 дугаар сард хийнэ.
ХИЛ ХОЛБОЛТЫН ТӨМӨРЗАМ БАРИГДСАНААР МУХАР ЗАМУУД МУХАРДЛААС ГАРНА. ЗҮҮН БАРУУН БОСОО ТӨМӨР ЗАМУУДЫГ БАРЬЖ УРД ХОЙД ХӨРШ, АЗИ ЕВРОПЫГ ХОЛБОСОН ТӨМӨР ЗАМЫН КОРИДОРОО НЭМНЭ.
