Олон улсад хүлээн зөвшөөрөгдсөн боловсролыг тэгш, хүртээмжтэй байдлаар төвийн болон алслагдсан бүс, төлбөртэй болон төлбөргүй сургуулийн хүүхэд гэдэг ялгамжгүйгээр бүх хүүхдэд хүргэх чиглэлд "БАГШ" нартайгаа тасралтгүй хамтран ажиллах болно.

Өнгөрсөн хугацаанд Англи улс дахь Cambridge Assessment International Education байгууллагатай хамтран Кембриджийн хөтөлбөрийг нэвтрүүлэх, заах арга зүйч бэлтгэх сургалтыг зохион байгуулах ажлыг тогтмол өрнүүлж жил бүр Сонгинохайрхан дүүргийн ерөнхий боловсролын сургуулийн багш нарыг хамруулж, багш нарын заах арга зүй, хичээлийн хөтөлбөрийг ОУ-ын чанар, стандартад нийцүүлэх ажлыг тасралтгүй зохион байгуулсан билээ.

Үүний тод нэгэн үр дүн нь СХД-ийн алслагдсан 42-р хороо, Зүүнсалааны Ерөнхий боловсролын 151-р сургуулийн 13 багш заах аргазүйч бэлтгэх хөтөлбөрт хамрагдаж, амжилттай төгсөж өнгөрсөн оноос тус сургууль 1-9-р ангийн Кембриджийн хөтөлбөрөө албан ёсоор эхлүүлсэн явдал байлаа. Өндөр боловсролыг зөвхөн өндөр төлбөртэй хувийн сургуулиас бус өөрийн хамран тойрох сургуулиасаа авдаг болох, ОУ-д хүлээн зөвшөөрөгдсөн сертификаттай төгсөх, гадаадын их дээд сургуулиас тэтгэлэгт хамрагдах боломжтой болгох нь Кембриджийн хөтөлбөрт шилжих, түүнийг хэрэгжүүлэхийн гол зорилго бөгөөд багш нэг бүрийн оролцоо хамтын ажиллагаа чухал үүрэгтэй билээ.

Мөн ЦХХХ-ны сайдын хувиар салбарын мэргэжилтнүүд, ОУ-ын байгууллагуудтай хамтран багшийн "Цахим ур чадвар"-ыг нэмэгдүүлэх, мэдээллийн технологийн мэдлэг олгон хөгжүүлэх олон арга хэмжээг санаачлан хэрэгжүүлж байна. Багш таны хүний болон нийгмийн хөгжлийг түүчээлэх, маргаашийн сайн сайхны үндсийг бэхжүүлэх их үйл хэрэгт тань амжилт хүсэж, талархан хүндэтгэе!
УИХ-ын гишүүн, ЗГ-ын гишүүн, ЦХХХ-ны сайд Ням-Осорын УЧРАЛ