Дэлхийн хэмжээнд амиа хорлолт нь 15-29 насныхны нас баралтын шалтгааны 4-т ордог. Харин манай улсын хувьд тус насныхны амиа хорлолтын түвшнээр бүс нутагтаа тэргүүлдэг байна. Өөрөөр хэлбэл, амиа хорлолтын асуудал бол бидний зайлшгүй анхаарах хэрэгтэй чухал талбар болоод байна. Иймд Монголд анх удаа өсвөр насны хүүхдийн сэтгэцийн эрүүл мэнд болон амиа хорлолтоос урьдчилан сэргийлэх "ГЭРЭЛТ-ЭРГЭЛТ" хэмээх цогц хөтөлбөрийг боловсруулан, улс орон даяар хэрэгжүүлж эхэллээ.

“Гэрэлт-Эргэлт” төсөл нь Австралийн Засгийн Газар, Австралийн сайн дурынхны дэмжлэгтэйгээр сургуулийн сэтгэл зүйчдийг өсвөр үеийнхэнтэй ажиллахад мэргэшүүлэх үндсэн зорилготойгоор хэрэгжиж байгаа билээ. Төслийн хүрээнд,

ЕБС-ийн сэтгэл зүйчдийг мэргэшүүлэхийн тулд Австралийн сэтгэцийн эмч Др.Жойес Арнолдын удирдлага дор 24 цагийн сургалт болон 28 цагийн супервишн зохион байгуулж байна. Ингэснээр сургуулийн сэтгэл зүйч нар өсвөр насны хүүхэдтэй ажиллах мэдлэг хийгээд практик ур чадвар сайжрах юм.
"Сэтгэл Зүй Хүний Хөгжлийн Шинэ Эхлэл Төв" ТББ-аас боловсруулсан “Гэрэлт-Эргэлт” сургалтыг заах эрхтэй багш болж бэлтгэгдсэнээр сургуулийн сэтгэл зүйчид амиа хорлолтоос урьдчилан сэргийлэх үйл ажиллагааг өргөн цар хүрээтэйгээр хэрэгжүүлэх боломжтой болох юм.

Тус сургалт нь өсвөр үеийнхэнд болон эцэг эхчүүдэд зориулсан хоёр төрлийн сургалттай бөгөөд “Гэрэлт-Эргэлт” төсөлд хамрагдаж буй сэтгэл зүйч тус бүр 100 хүүхэд, 50 эцэг эхэд сургалт орох юм. Төслийн үр дүнд нийт 3500 хүүхэд, 1750 эцэг эхэд өсвөр үеийнхний амиа хорлолтоос урьдчилан сэргийлэх сургалтыг хүргэсэн байх болно.

“ГЭРЭЛТ-ЭРГЭЛТ” гэж юу вэ?

Бусдын амьдралд гэрэл гэгээ болох, бусдын гэрэл гэгээг харж эерэг нөлөөг хүлээн авах: Үр дүнд нь эрсдэлт алхамаас бусдыг эргэлт хийхэд нь хүргэх явдал юм.

Гэрэлт гэдэг үгний Г үсэг л байраа өөрчилөхөд Эргэлт болдог. Бид Гэрлийг харах үедээ зөв ЭРГЭЛТийг хийж чаддаг.

Бусдын сэтгэцийн эрүүл мэндэд анхаарах гэдэг бол, Тэднийг ойлгох, сонсох, анхаарах, тэдний үнэ цэнтэй гэдгийг мэдрүүлэх явдал. Эдгээрийг хийснээр тухайн хүн хайрлагдсан гэх мэдрэмж авч өөртөө итгэлтэй болно. Зөвхөн "Гэрэлт-Эргэлт" хөтөлбөрөөр хязгаарлагдахгүй гэр бүл, эргэн тойрон, найз нөхөд бүхий л хүрээлэлдээ энэ арга замыг хэрэгжүүлснээр олон хүний амьдралд эерэг нөлөө гарах юм.

Т.Хонгорзул Клиник сэтгэл засалч

“Хүн бүрийн сэтгэл зүрхэнд ГЭРЭЛ асаалттай байгаасай. Бид заримдаа сэтгэлээр унадаг ч, энэ нөхцөл байдлаас ЭРГЭЛТ хийх боломж хүн бүрд бий.”

“Гэрэлт-Эргэлт”-ийн үр дүнд өсвөр насныхан өөрсдийн сэтгэл зүйн онцлогийг таньж мэдэх, сэтгэл хөдлөлөө анзаарч зохицуулж сурах, эрүүл харилцааны талаар мэдэх, тусламж хэрэгтэй үед хаана, хэнд хандахаа мэддэг болох, аюулгүй байдлын төлөвлөгөө гаргах, асуудлыг даван туулах чадваруудад суралцах юм. Харин эцэг эхчүүдийн хувьд хүүхдийнхээ аюулгүй сэтгэл зүйн орчныг бүрдүүлэхэд хэрхэн анхаарах талаар мэдэж авах болно.

Хүн бүр үнэ цэнтэй бөгөөд хүний үнэ цэн хэзээ ч алдагдахгүй. Үнэ цэнтэй санаж, өөрийн сэтгэцийн эрүүл мэндэд анхаарч, зохицуулж сурах нь маш эрхэм бөгөөд чухал чадвар билээ.

ХАМТДАА “ГЭРЭЛТ - ЭРГЭЛТ” ХИЙЦГЭЭЕ