Энэ жил монголчуудын хувьд парламентад болон орон нутгийнхаа өөрөө удирдах байгууллагыг өөрсдийн төлөөллөөр бүрдүүлэх сонгуульд сонголт өгсөн хариуцлагатай жил байлаа. Дээрх сонгуулиуд харьцангуй тайван, хуулийн хүрээнд, эмх журамтай явагдлаа гэдгийг Сонгуулийн Ерөнхий хороо онцолж байгаа.

Дөрвөн жилд нэг болдог сонгууль зохион байгуулахад шаардлагатай бүх л арга хэмжээг авч ажилласнаа тус хорооноос илэрхийлсэн. Тухайлбал Хэдхэн хоногийн өмнө болсон Аймаг, нийслэл, сум, дүүргийн иргэдийн Төлөөлөгчдийн Хурлын сонгуульд 2395 тойрог, 8031 мандатын төлөө 10 нам, 1 эвслээс 17010, бие даан нэр дэвшигч 268, нийт 17278 нэр дэвшигчид өрсөлдөн.Орон нутгийн сонгуулийг зохион байгуулж явуулахад СЕХ-оос шат, шатны сонгуулийн хороодыг мэргэжил, арга зүйн удирдлагаар ханган ажилласан бөгөөд 10 удаа зөвлөмж, чиглэл хүргүүлсэн юм. Тухайлбал, сонгуулийн зохион байгуулалт, явц сонгуульд оролцогч тал, ажиглагч, олон нийт, хэвлэл мэдээллийн байгууллагад нээлттэй байх зөвлөмж өгсөн.

Улмаар сонгогчийн ирцийг шууд дамжуулахаар алслагдсан хэсэгт байрлаж байгаа хэсгийн хороодод 381 интернэтийн сүлжээний төхөөрөмж (старлинк) байршуулж бэлтгэлээ базаасан. Монгол Улсын хэмжээнд ашиглагдах бүх санал тоолох төхөөрөмж болон саналын хуудсыг нам, эвсэл, төрийн бус байгууллага хэвлэл мэдээллийн байгууллага, олон нийтийн нээлтэй оролцоотойгоор шалган туршиж, баталгаажуулсан билээ. Иргэдийн хувьд ч Үндсэн хуулиар баталгаажсан сонгох эрхээ эдэлж, идэвхтэй оролцож, 53.1 хувийн ирцтэйгээр сонгуулийн санал хураалт өндөрлөсөн.

Хэдийгээр сонгогчдын саналын тоогоор нийт 19 аймгийн 75 сумын 87 хэсэгт нэмэлт санал хураалт явуулахаар болсон ч үүнийг амжилтай зохион байгуулж дууссан. Энэ долоо хоногоос нийслэл, дүүрэг, аймаг, сумын Засаг дарга нар томилогдож ажил үүрэгтэй орлоо. Төсвөө бүрдүүлэх, захиран зарцуулах эрх нь орон нутагт бий. Иймд иргэд ирэх дөрвөн жилд таны сонгосон хүн хэрхэн ажиллахад анхаарч, саналаа хэлж, шахаж шаардаж ажиллах үлдлээ.

П.Дэлгэрнаран: Иргэд орон нутгийнхаа өөрөө удирдах байгууллагын төлөөллөө шахаж, шаардаж ажиллах хэрэгтэй