Улаанбаатар хотыг 2040 он хүртэл хөгжүүлэх ерөнхий төлөвлөгөөний төслийг өргөн барьсан талаар хотын дарга Х.Нямбаатар танилцуулав. 

Тэрбээр "Хотын хөгжлийн чиг ерөнхий чиг хандлагыг тодорхойлсон хот төлөвлөлтийн үндсэн хууль гэж хэлж болох энэ баримт бичгийг монголын тэргүүлэх хот төлөвлөгчид болон гадаадын хот байгуулалтын чиглэлийн судлаачдын хамтарсан ажлын хэсэг 2017 оноос хойш ажиллаж, боловсруулсан. 

Монгол Улсын нийслэл Улаанбаатар хот анх 1954 онд ерөнхий төлөвлөгөөгөө баталж байсан. Үүнээс хойш зургаа дахь удаагийн ерөнхий төлөвлөгөөг боловсруулаад байна. Уг төслийн үндсэн зарчим 20 минутын хотуудын нэгдэл буюу хүртээмжтэй хотыг цогцлооход чиглэсэн. 2040 он гэхэд манай хотын хүн ам ойролцоогоор 2.5 сая хүрнэ гэж тооцоолж байгаа. Тиймээс энэ хүн амд хүрэлцэхүйц нийгмийн суурь үйлчилгээ, замын сүлжээ, дэд бүтэц, инженер хангамжийн байгууламж, нийтийн тээвэр, ногоон байгууламжийн хүртээмжийг нэмэгдүүлэхээр тусгасан. 

Цахилгаан, дулааны хангамжийг нэмэгдүүлэх, шугам сүлжээ өргөтгөх чиглэлд улс, нийслэлийн төсвийн хөрөнгийг чиглүүлнэ. Төлөвлөлттэй инженер хангамжийн дэд бүтэцтэй газарт төр, хувийн хэвшлийн түншлэлээр бүтээн байгуулалт хийх төлөвлөлт хийсэн. Ингэснээр нүдэнд харагдахуйц үр дүн гарна. 

Тухайлбал явган хүний замын нийт уртыг 9 дахин нэмэгдүүлэх, дугуйн замыг 20 дахин нэмэгдүүлэх, замын сүлжээг 17 мянган км-ээр нэмж өргөтгөх ажлыг хийнэ.

Ингэснээр оргил ачааллын үед 9 км/цаг хурдтай байгаа замын хурд 22.5 км/цаг болж нэмэгдэх тооцоолол гарсан. Түүнчлэн нийт айл өрхүүдийн 80 орчим хувийн төвлөрсөн болон хэсэгчилсэн дулаан хангамж бүхий орон сууцаар хангах зорилтуудыг дэвшүүлсэн ерөнхий төлөвлөгөө боловсрууллаа" хэмээв.