Улсын бүртгэлийн байгууллага 2025 оноос эхлэн албан хэргийг кирилл болон монгол бичгээр зэрэгцүүлэн хөтөлж эхэллээ.

XIII зуунаас эхлэн Монголчууд монгол бичгийг төрийн үйл хэрэг хөтлөхөд хэрэглэж ирсэн бөгөөд Монгол үндэстэн оршин тогтнох соёл, сэтгэлгээний баталгаа болсон монгол бичгийг сурч эзэмших, судлан сурталчлах, түгээн дэлгэрүүлэх, хамгаалан хөгжүүлэх нь иргэд, олон нийт, төрийн байгууллага төдийгүй дэлхийн бичиг соёлын өв сангийн өмнө монголчуудын хүлээж буй эрхэм үүрэг мөн билээ.

Төрийн албан хэргийг 1994 оноос эхлэн монгол бичгээр хөтлөх бэлтгэл ажлыг хангахаар шийдвэрлэж, нийт хүн амыг монгол бичигт сургах, хөтөлбөр сурах бичиг, толь бичиг гаргах, бичээч нарыг бэлтгэх ажлыг зохион байгуулж эхэлсэн.

Монгол хэлний тухай хуулийн 7 дугаар зүйлийн 7.2 дахь хэсэг, Монгол Улсын Засгийн газрын 2022 оны 7 дугаар тогтоолын 5.4 дэх хэсгийг үндэслэн төрийн болон нутгийн өөрөө удирдах байгууллагууд 2025 оны 01 дүгээр сарын 01-ний өдрөөс эхлэн албан хэргээ кирилл болон үндэсний хос бичгээр зэрэгцүүлэн хөтлөх болсонтой холбогдуулан Улсын бүртгэлийн байгууллагын зохион байгуулалтын нэгж, орон нутгийн газар, хэлтэст “Агентлагийн албан хэрэгт кирилл болон үндэсний бичгийг хослон хэрэглэх тухай” тушаалыг кирилл болон монгол бичгээр хөтлөн хүргүүлж, үүрэг чиглэл өглөө.