Шадар сайд С.Амарсайхан Багануур дүүрэгт ажиллах үеэрээ "Шимт баруун байдлагийн үндэс" хоршооны үйл ажиллагаатай танилцаж, шинэ хоршоо хөдөлгөөний талаарх санал хүсэлтийг нь сонслоо.

"Шимт баруун байдлагийн үндэс" хоршооны гишүүн Э.Түвшинбаярынх 40 сая төгрөгийн хөрөнгө оруулалтын зээл авч, махны үхэр үржүүлэх, ногоон тэжээл тариалах чиглэлээр үйл ажиллагаа эрхэлж байна. Тодруулбал, 20 гаруй үхэр 60 гаруй тугал үржүүлэхээс гадна 40 га талбайд ногоон тэжээл тарьж, 5000 гаруй боодол ногоон тэжээл хураан авсан байна.

Хоршоологч Э.Түвшинбаяр "Би Багануур дүүрэгт ирж суурьшаад 4 жил болж байна. Өнгөрсөн онд Шинэ хоршоо хөдөлгөөнд нэгдэн орж, хоршооныхоо үйл ажиллагааг эхлүүлсэн нь цаг үеэ олсон чухал алхам болсон. Энэ жилийн хувьд тариалсан ногоон тэжээлээ борлуулж зээлийн эргэн төлөлтөө цаг хугацаандаа хийгээд явж байна. Цаашид мах боловсруулах, жижиглэн борлуулах чиглэлээр үйл ажиллагаагаа өргөжүүлэхээр зорьж байна. Энэ хүрээнд шаардлагатай техник, тоног төхөөрөмжийн судалгаагаа гаргасан. Үүнээс гадна энэ салбарт маш том орон зай, ирээдүй байна. Залуучууд маань өөрсдийн жижиг бизнесээ эхлүүлэх алхмаа хийхэд Шинэ хоршоо хөдөлгөөний хөрөнгө оруулалтын зээл маш том дэмжлэг болно" гэв.

Багануур дүүргийн хэмжээнд нийт 4 хоршоо шинээр байгуулагдсан бөгөөд хоршооны 12 малчин 405.0 сая төгрөгийн хөрөнгө оруулалтын зээлд хамрагдаад байна.

Шадар сайд С.Амарсайхан Багануур дүүрэгт ажиллав