Монгол, Италийн хооронд шууд нислэгтэй болох тухай сайхан мэдээг УИХ-ын гишүүн Б.Мөнхсоёл өөрийн цахим хуудсандаа нийтэлжээ.

Тодруулбал тэрбээр Итали Улсын Элчин сайд хатагтай Жованна Пиккарретатай уулзах үеэр хоёр улсын хооронд 2025 оны зунаас шууд нислэгтэй болох талаар дурдсан байна. 

Итали Улсаас Монгол Улсад суух Онц бөгөөд Бүрэн эрхт Элчин сайд Жованна Пиккаррета 2024 оны хоёрдугаар сарын 5-нд Ерөнхийлөгч У.Хүрэлсүхэд Итгэмжлэх жуух бичгээ өргөн барьж байв. Элчин сайд Ж.Пиккаррета улс төр, эдийн засаг, худалдаа, соёл, боловсрол зэрэг салбарын хамтын ажиллагааг  идэвхжүүлэхийн төлөө ажиллахаа илэрхийлж байс бөгөөд эхнээсээ ажил хэрэг болох нь. 

УИХ-ын гишүүн Б.Мөнхсоёл хэлэхдээ “Монголчууд маань аялах, арилжаа худалдаа хийх, оюутан сурагчид суралцах зэрэг янз бүрийн зорилгоор Итали Улс руу явдаг билээ” гэсэн юм.