УИХ-ын 9 дэх удаагийн сонгуулийн үр дүнгээр байгуулагдсан парламентын анхны намрын ээлжит чуулган 81 өдөр чуулж, өндөрлөлөө.

Намрын чуулганы хугацаанд Засгийн газар тэр дундаа Сангийн яамныхны хувьд өндөр ачаалалтай ажиллаж, Монгол Улсын санхүү, эдийн засгийн ойрын болон дунд хугацааны хөгжлийн баримт бичгүүдийг өргөн барьж, хэлэлцэн баталсан билээ. 

Энэ талаар УИХ-ын гишүүн, Сангийн сайд Б.Жавхлан “2025 оны төсвийн тухай хуульд Ерөнхийлөгч бүхэлд нь хориг тавьсан учир УИХ хоригийг хэлэлцэн  хүлээн авсан. Ерөнхийлөгчийн “алдагдалгүй төсөв батлах” чиглэлийг  дагуу Засгийн газар 2025 оны төсвийн төслийг шинэчлэн боловсруулж, дахин өргөн барьж хэлэлцэн баталлаа.

Түүнээс гадна гуравдагч хөрштэй байгуулж буй хоёр дахь томоохон хөрөнгө оруулалтын гэрээг Монгол Улсын Засгийн газар болон Бүгд найрамдах Франц улсын Орано майнинг компанитай байгууллаа.

Гэрээний төслийг боловсруулахад Татвар, санхүүгийн чиглэлд Сангийн яамны хамт олон дэд ажлын хэсэгт амжилттай ажиллав.

Энэхүү гэрээ манай улсын эрх ашигт нийцсэн, орд газрын дийлэнх үр өгөөжийг ард түмэн хүртэхээр байгуулсан хэмээн үзэж байна.

Мөн Татварын  ерөнхий хуульд нэмэлт, өөрчлөлт оруулах тухай, Зээлийн хэлэлцээр соёрхон батлах тухай, Хархорум хотын бүтээн байгуулалт, хөгжлийг дэмжих тухай хуулиуд болон“Монгол Улсын Эрдэнэсийн сангийн үндсэн болон гүйлгээ сангийн орлого, зарлагын 2024 оны гүйцэтгэл, 2025 оны төсвийн тухай” хуулиудыг хэлэлцэн батлав” хэмээн байр сууриа илэрхийллээ.