Хавдар судлалын үндэсний төвд элэг шилжүүлэн суулгах анхны хагалгаа хийсний 7 жилийн ойн өдөр болж байгаа талаар УИХ-ын гишүүн Ж.Чинбүрэн мэдээлэв.

Хавдар судлалын үндэсний төвийн Элэг шилжүүлэн суулгах баг 2018 оны 1 сарын 28-ны өдөр БНСУ-ын “Самсунг медикал” эмнэлэгтэй хамтран элэгний хортой хавдартай өвчтөнд эрүүл хүнээс элэг шилжүүлэн суулгах хагалгааг хийж байв.

Тус хагалгааг удирдаж хийсэн УИХ-ын гишүүн Ж.Чинбүрэн “Хагалгаа нийт 7 цаг 7 минутын турш үргэлжилсэн. Үүнээс хойш эдүгээ Хавдар судлалын үндэсний төвд 180 дахь хагалгааг хийх гэж байна.

Олон хүний амь нас, эрүүл мэндийг хамгаалж, нөгөө талаар Монголоос гадагшаа урсах байсан их мөнгийг үлдээж эдийн засагтаа хувь нэмрээ оруулжээ.

Өнөөдрийн өндөрлөгөөс эргээд харахад өвчилсөн, муу элгийг бүтнээр нь аваад, эрүүл хүний элэгний талыг тайраад нөгөө хүндээ шилжүүлэн суулгадаг, олон судас залгадаг асар хүнд энэ мэс заслыг манай залуучууд бие дааж хийж байна.

Манай улсад анх 2011 онд элэг шилжүүлэн суулгах мэс заслыг Улсын нэгдүгээр төв эмнэлэгт нэвтрүүлсэн. Хавдар Судлалын Үндэсний төв эмнэлэг элэгний хортой хавдартай өвчтөнд элэг шилжүүлэн суулгах мэс заслыг нэвтрүүлсэн гэдгээрээ анхдагч билээ. Эдүгээ Улсын хоёрдугаар төв эмнэлэг элэг шилжүүлэн суулгах мэс заслыг нэвтрүүлэхээр зорилт тавин, ажиллаж байна.

Манай улсад элэгний өвчлөл, тэр дундаа элэгний хортой хавдар зонхилон тохиолддог. Тиймээс элэг шилжүүлэн суулгуулахаар хүлээж буй өвчтөнүүдийн хүлээлт, дарааллыг багасгаж, иргэдэд цаг алдалгүй тусламж үзүүлэх эмчилгээний шинэ технологиудыг Монгол Улсдаа улам олноор нь нутагшуулаасай гэж хүсэж байна.

Олон ийм эмчилгээг Монголдоо хийдэг болохын төлөө хичээж мэрийж буй залуучуудаа илүү сайн дэмжиж ажиллана.

Хавдар судлалын үндэсний төв эмнэлгийн элэг шилжүүлэн суулгах багийн залуучуудаараа үргэлж бахархдаг" гэсэн юм.

Ж.Чинбүрэн: ХСҮТ-д элэг шилжүүлэн суулгах хагалгаа хийсний 7 жилийн ой тохиож байна