УИХ-ын намрын ээлжит чуулган хаалтаа хийж, УИХ-ын гишүүн Н.Алтаншагай тойрогтоо ажиллаж байна. 

Тэрбээр өнөөдөр Сонгинохайрхан дүүргийн Нэгдсэн эмнэлгийн удирдлага, албан хаагчтай уулзаж, нэн тэргүүнд шийдвэрлэх асуудлуудтай танилцжээ.

Энэ үеэр УИХ-ын гишүүн Н.Алтаншагай “Сонгинохайрхан дүүргийн хувьд 350 гаруй мянган оршин суугчтай Нийслэлийн том дүүргийн нэг. Тийм ч учраас эрүүл мэндийн салбарт олон шийдвэрлэх асуудал гардаг. Сонгинохайрхан нэгдсэн эмнэлэг анх 1982 онд нээгдэж, хүүхдийн тусламж үйлчилгээг үзүүлж байсан.

Харин 2020 онд дэлхийн стандартад нийцсэн жишиг Нэгдсэн эмнэлгийг барьж ашиглалтад оруулснаар өнөөдөр 360 гаруй ор, 630 гаруй албан хаагчтай болж өргөжөөд байна. Өнөөдрийн байдлаар дуран, төрөл бүрийн мэс заслууд, өдрийн эмчилгээ, бөөр орлуулах эмчилгээ, хавдрын эмчилгээ гээд олон төрлийн эмнэлгийн тусламж үйлчилгээг үзүүлж байна” гэв.

Уулзалтын үеэр Нэгдсэн эмнэлгийн Эмнэлзүй эрхэлсэн дэд захирал Д.Сүнжидмаа дурангийн тусламж үйлчилгээг өргөжүүлэх төсөл, СТ Angiography аппаратыг суурилуулах, RFA эмчилгээг нэвтрүүлэх төслүүдийг танилцуулжээ.

Эдгээр хоёр төсөл болон хүүхдийн хуучин эмнэлгийн гадна фасадыг засварлах ажлыг шийдвэрлэх тал дээр бүхий л бололцоогоороо дэмжиж ажиллахаа Н.Алтаншагай гишүүн илэрхийллээ.