БЗД-ийн 26 хорооны 640 хүүхдийн сургуулийн барилгын ажил дуусаж, Улсын комисст хүлээлгэн өгөхөд бэлэн болжээ.

Тус дүүргийн 26 дугаар хороо хүн амын нягтаршил ихтэй, сургууль цэцэрлэгийн хүртээмж тааруу хорооны нэг юм. Иргэдийн удаа дараагийн тойргийн гишүүдэд тавьж ирсэн хүсэлт ийнхүү биелэлээ олсон байна. 

Уг бүтээн байгуулалтын санхүүжилтийг УИХ-ын гишүүн Б.Энхбаяр удаа дараа УИХ дээр хөндөж, төсвийг нь шийдэж чадсан юм. Улмаар 1300 хүүхдийн багтаамжтай шинэ сургууль сурагчдаа хүлээн авахад бэлэн болжээ. 

УИХ-ын гишүүн Б.Энхбаяр хэлэхдээ “Миний хувьд тус сургууль барих газрын асуудал, санхүүжилтийг нь төсөвт суулгахад эхнээс нь анхаарал хандуулж ирсэн. Тус сургууль нь 2 ээлжээр хичээллэх боломжтой. Нэг ээлжиндээ 640 хүүхэд, нийтдээ 1300 хүүхдийн багтаамжтай бөгөөд хамгийн орчин үеийн шийдэл, зураг төслөөр Улаанбаатарт баригдсан анхны сургууль гэдгийг гүйцэтгэгч компанийн зүгээс онцолж байгаа юм.

1-3 дугаар давхар хүртлээ нэвт байгалийн гэрэлтүүлэг ашигласан бөгөөд дуу тусгаарлагчтай 2 спорт заал, 1 урлаг заал, нэг удаа 300 хүүхэд хооллох боломжтой заалтай, нэг ангидаа 30 хүүхэд хичээллэх 22 анги танхим болон мэдээлэл технологи, физик, хими зэрэг төрөлжсөн дугуйлангийн анги танхимтай байх юм” хэмээн мэдээлэв.