Энэ оны нэгдүгээр сарын 23-24-нд шилжих шөнө нэг гэр бүлийн 6 хүн Баянгол дүүргийн нутаг дэвсгэрт угаартаж нас барсан харамсалтай хэрэг гарсан.

Тус гэр бүлээс цор ганцаараа үлдсэн хүү нь хугацаат цэргийн алба хааж байжээ. Тэрбээр цэргийн ангиасаа ирж, болсон явдлын талаар хэвлэлд ярилцлага өгсөн юм.

Уг асуудалтай холбогдуулан УИХ-ын гишүүн П.Батчимэг байр сууриа илэрхийллээ. Түүний хувьд “Агаарын бохирдлыг бууруулах хүрээнд утааны асуудлаарх бодлого, шийдвэрийн хэрэгжилтийн үр дүн, шийдэл” ерөнхий хяналтын сонсгол зохион байгуулах ажлын хэсгийн гишүүн. Тус ажлын хэсгээс ерөнхий хяналтын сонсголыг энэ сарын 3-4-ний өдрүүдэд зохион байгуулсан.

Тэрбээр “Цэргийн дүүд гүн эмгэнэл илэрхийлье. Хорвоогийн зовлон их ээ, гэвч энэ хүүд гэнэт тохиолдсон уй гашуу дэндүү их юм. Түүний нулимсаа тэвчин ярихыг сонссон хэн бүхэнд ямар байх нь ойлгомжтой. УИХ хэдхэн хоногийн өмнө утааны хяналтын сонсгол хийж, иргэдийн үг, уур бухимдлыг нүдээрээ харж, чихээрээ сонссон. Иргэд утааны асуудалд үнэхээр бухимдлаа барьж дийлэхгүй болсон байна. Хариуцлага нэхэж байна. Нэхэх ч ёстой!

2017 оноос хойш хичнээн хүний алтан амийг энэ олон мянган зуух, сайжруулсан шахмал түлш авч одов. Дайн дажингүй, энхийн цагт монголын төр иргэдээ нэг нэгээр нь, олноор нь утааны гамшигт алдаж байна. Иймд Монголын төр амь насаа алдсан олон зуун иргэдийн ар гэрээс уучлал гуйх ёстой” хэмээв.

П.Батчимэг: Энхийн цагт монголын төр иргэдээ олноор нь утааны гамшигт алдаж байна