Хэдэн өдрийн өмнө цахим хуудсуудаар “бага насны хүүхэд гарц дээр ногоон гэрлээр гарч яваад амиа алдлаа” гэсэн мэдээлэл цацагдсан. Энэ мэдээллийн дагуу Улсын Их Хурлын Хүний эрхийн дэд хорооны дарга, гишүүд Тээврийн цагдаагийн дарга хурандаа Б.Дэлгэрсайхантай уулзаж тодруулга авсан.

Энэ дагуу тус газраас статистик дүн мэдээллүүдийг нэгтгэж өнөөдөр Тээврийн цагдаагийн албаны “Замын хөдөлгөөний удирдлагын төв” дээр Хүний эрхийн дэд хорооны зүгээс хамтран ажиллалаа.

Уулзалтад Улсын Их Хурлын Хүний эрхийн дэд хорооны дарга С.Эрдэнэболд, УИХ-ын гишүүн Х.Баасанжаргал, Г.Очирбат нар оролцлоо. Мөн Цагдаагийн ерөнхий газрын Дэд бөгөөд Нийслэлийн цагдаагийн удирдах газрын дарга, цагдаагийн хурандаа О.Ганбат, Тээврийн цагдаагийн албаны дарга, цагдаагийн хурандаа Б.Дэлгэрсайхан, тус албаны Дэд бөгөөд Замын цагдаагийн газрын дарга, цагдаагийн хурандаа С.Галбадрах, Замын цагдаагийн газрын Зам тээврийн хяналтын хэлтсийн дарга, цагдаагийн хурандаа Б.Очирбат, Замын цагдаагийн газрын Замын хөдөлгөөний удирдлагын хэлтсийн дарга, цагдаагийн хурандаа Ч.Батболд, мөн албаны Урьдчилан сэргийлэх хэлтсийн дарга, цагдаагийн дэд хурандаа Д.Оюун, “Замын хөдөлгөөний удирдлагын төв” ОНӨҮГазрын захирал Ч.Хувьзаяа нар оролцлоо.

Улаанбаатар хотын хэмжээнд 176 уулзвар байдаг бөгөөд 2023 онд 292 явган зорчигч зам тээврийн осолд өртсөн бол 2024 онд 535 явган зорчигч хохирч хэргийн гаралт огцом өссөн нь сэтгэл түгшээж байна.
Тухайлбал 2023 онд зохицуулалттай гарц дээр 16 явган зорчигч, зохицуулалтгүй гарц дээр 276 явган зорчигч гэмтсэн байсан бол 2024 онд энэ тоо 535 болж 56.5%-иар эрс өсжээ. Энэ бол автомашин жолоодож яваа хүмүүс анхаарал болгоомжгүйгээр жолоодлого үйлдэж, бусдын амь бие, эрүүл мэндэд ноцтойгоор заналхийлж буй үйлдэл юм.

Монгол Улсын Үндсэн хуулиар олгосон хүний амьд явах, эрүүл, аюулгүй орчинд амьдрах эрх буюу аюулгүй байдлын баталгааг хангах нь төрийн үүрэг. Энэ ч үүднээс Хүний эрхийн дэд хороо Монгол хүний эрх ашиг, Монгол хүний эрх зөрчигдөж байгаа салбар бүрд очиж асуудлыг жижиг том гэлтгүй шалтгаант холбоог нь тодруулахаар ажиллаж байна.

Ойрын хугацаанд Тээврийн цагдаагийн албанаас Улаанбаатар хотын 1,181км замд тээврийн осол аюулыг бууруулахын тулд эрсдэлийн үнэлгээ хийж ялангуяа бага насны хүүхдийг аюулгүй зорчих стандартыг сайжруулахад чиглэсэн цогц арга хэмжээг авах, судалгаа хийх чиглэл өглөө. 3-р сарын 10 гэхэд уг судалгаа иж бүрэн гарах бөгөөд үүний дараагаар шат дараатай арга хэмжээнүүдийг нийслэл болон холбогдох яамдуудтай хамтарч хийнэ. Нэг ч гэсэн Монгол хүн их хотдоо амьд явах, эрүүл аюулгүй орчинд амьдрах эрхээ эдлэх стандарт хангах нь чухал гэдгийг талууд ярилцаж ойрын хугацаанд шийдвэртэй алхмууд хийх боллоо.

Сэтгүүлч

Сэтгүүлч Б.Хонгорсайхан