Эдийн засгийн байнгын хорооны өнөөдрийн (2025.04.16) хуралдаанаар Монгол Улс болон Евразийн эдийн засгийн холбоо, түүний гишүүн орнууд хооронд байгуулах худалдааны түр хэлэлцээрийн төслийг хэлэлцэх байсан ч судалгаа дутуу гэх үндэслэлээр хэлэлцэхээс татгалзаж, хойшлуулсан.

Хэлэлцэж буй асуудалтай холбогдуулан гишүүд саналаа хэллээ.

УИХ-ын гишүүн Б.Мөнхсоёл:

Энэ асуудал бол үйлдвэрлэгчид, тус салбарынхны анхаарлыг татсан чухал асуудал. Эдийн засгийн байнгын хороогоор хэлэлцэх байсан энэ асуудал хойшилсон. Учир нь олон нийтийн хэлэлцүүлгийг маш сайн хийх ёстой ч дутуу хийгдсэн, Хүнсдийн холбооноос хэд хэдэн гишүүдэд ирүүлсэн бичигт судалгааны үр дүнгүүд зөрчилтэй байгааг дурдсан байна. Тухайлбал, Хүнсчдийн холбооноос МУИС-ийн Эдийн засгийн шинжилгээ хийдэг хүрээлэнд захиалсан судалгааны үр дүн энэ хэлэлцээрийн үр ашиг тааруу байна гэж дүгнэсэн. Харин ЭЗХЯ-аас хийсэн JC загвар ашиглаж гаргасан судалгааны үр дүн боломжгүй биш юм гэж гарчээ. Бидний хөндөж буй асуудал нь сүү, сүүн бүтээгдэхүүн, хуурай сүү, шатахуун тос гээд орлуулах бүтээгдэхүүнүүд дээр анхаараач ээ. Бид олохоосоо илүү алдах вий гэдэг эрсдлийг хүмүүс анхааруулж байна. Мэдээж Монгол Улсын зах зээл дээр үйлдвэрлэхээсээ илүү худалдаа наймаанд оролцдог аж ахуйн нэгжүүд их шүү дээ. Тиймээс эдгээрийн хооронд зөрчил байна. Бодлого боловсруулах гээд сууж байгаагийн хувьд улсынхаа эдийн засагтаа ямар ач холбогдолтой болох, дотоодын үйлдвэрлэгчдийг сүйрүүлэхгүйгээр, тэдний эрсдлийг нэмэхгүйгээр, мотивацийг нь унагаахгүйгээр хэрхэн яаж энэ хэлэлцээрийг зөв зүйтэй авч явах вэ гэдэг дээр зайлшгүй анхаарах хэрэгтэй. Төлбөрийн тэнцэл ч бай, худалдааны тэнцэл ч бай тэдгээрийг харахаар олж байгаагаасаа илүү алдаж байгаа нь өндөр болчихоод байна. Бид бүгд мэдэж байгаа. Танилцуулган дээр график тооцоонууд байгаа учраас. Хөрш оронтойгоо тохиролцоо явж байгааг ойлгоод байгаа. Тэгэхээр аль талд нь аль бүтээгдэхүүн үйлчилгээн дээр нюанстай явах гэдгээ анхаарахаас өөр аргагүй.