-Дахин төлөвлөлтөд орох шаардлагатай нийтийн орон сууцанд амьдарч буй хэчнээн иргэний асуудлыг хэрхэн шийдвэрлэхээр ажиллаж байна вэ?
-Өнгөрсөн оны 11 дүгээр сарын 29-ний өдрийн Нийслэлийн иргэдийн хурлаар Нийслэлийн өмчит “Улаанбаатар орон сууцжуулалт” ХХК байгуулагдсан. Дахин төлөвлөлтийн үйл ажиллагааг хүний эрхэд тулгуурласан, үр ашигтай, хурдтай зохион байгуулах бүхий ашиглалтын шаардлага хангахгүй, нийтийн зориулалттай орон сууц, мөн гэр хорооллын дахин төлөвлөлтөд чиглэсэн, эрх шилжүүлж ирсэн төслийг үр ашигтай хэрэгжүүлэх зорилготой төрийн байгууллага юм.
Нөлөөлөлд өртсөн байруудын ашиглалтад орсон хугацаанаас эхлэн өнөөдрийг хүртэлх түүх бүр харилцан адилгүй учир дахин төлөвлөлтийн үйл ажиллагааг хэрэгжүүлэхэд зөвхөн нэг менежментийг барих боломжгүй юм байна. Зарим нь 30-аадхан оршин суугчидтай байхад, зарим нь 100 гарна.
Оршин суугчдын тоо олшрох тусам тухайн байршилд дахин төлөвлөлт хийх барилгын компанийн сонирхол багасаж эхэлдэг. Хотын зах руу бүр буурна. Дэд бүтцийн хүртээмжгүй болохоор ордоггүй гэх мэт байршил болгон өөрийн онцлогтой учраас ямар байршил дээр, ямар тулгамдсан асуудал байгаад түүнийг бид хэрхэн шийдэх боломжтой вэ гэдэг нь дахин төлөвлөлтийн зорилго юм.
-Гацаад байсан дахин төлөвлөлтийн төслүүдийг зөв менежмент хийх замаар амжилттай хэрэгжүүлэх зорилготой гэлээ. Гацаанаас гаргах гол түлхүүр нь юу вэ?
-Төр, иргэн, бизнесийн байгууллага 3 нэг мэдээлэлтэй хэлцэлд орж гэмээ нь төсөл хурдан хэрэгждэг.
10 хоногийн өмнө бизнесийн байгууллагуудтай "Бизнес ба боломж" сэдвийн хүрээнд уулзалт хийсэн бол өнөөдөр иргэддээ "Асуудал ба шийдэл" уулзалтыг зохион байгуулж байна. Энэ 3 талын ойлголцол төсөл амжилттай хэрэгжих үндэс юм.
Манай Хот дахин хөгжүүлэх тухай хуулийг батлаад 10 жил болж байна. Өнгөрсөн 10 жилийн оноог нь сайжруулж, алдааг нь давтахгүй байх зорилготойгоор төр, иргэн, бизнес гэсэн 3 талын хэлхээ болон ажиллаж байна.
Учир нь байгалийн эрсдэл, нийгмийн эрсдэл, давагдашгүй хүчин зүйлүүдийн эрсдэлийг 50, 60-аас дээш жилийн насжилттай орон сууцнууд давах эрсдэл улам л бага болж байна. Эрсдэлийн дараа биш учрахаас өмнө тухайн иргэнийг шаардлагад нийцсэн орон сууцанд амьдруулъя гэдэг үүргээ төр биелүүлж байгаа хэрэг.
-Төсөл удаашрах, гацах гол шалтгаан нь юу вэ?
-Иргэд өмчтэйгөө холбоотой шийдвэр гаргах гэж байна шүү дээ. Тийм ч учраас нухацтай хандах ёстой юм. Тэр нь зөв.
Ашиглалтын шаардлага хангахгүй, дахин барилгажуулах захирамж гаргахад тухайн байрны иргэдийн 80 хувийн нь саналыг авах ёстой. Тэгэхээр энэ 80 хувийн шийдвэр нь дахин барилгажуулах шийдвэр болдог. Үүний дараа тухайн төслийг амжилттай хэрэгжүүлэхэд 100 хувийн санал өгсөн байх ёстой. Ийм учраас хүмүүс нухацтай ханддаг. Үүнд бид үгүйсгэл хийдэггүй. Гэхдээ “би нухацтай хандаж байна, би хардах эрхтэй” гээд ганцаараа сөрж зогсохыг бид төслийн үйл ажиллагаа гэж нэрлэхгүй.
Цөөн хүмүүст сөрөг ойлголт байдаг. Гэхдээ бид хүчээр тулж, дайрч давшлахгүйгээр аль болох ойлголтыг жигд, үнэн, хуулийн хүрээнд хүргэж, тохиролцоонд хүрэх, хэлцэлд хүрэх явдлыг чухалчилдаг.
Хэрэгжүүлэх гэж байгаа 80-аад төсөл дээр хамгийн багадаа 175 уулзалт хийсэн. Мэдээлэл нуугаад, тэдэнд ойлгогдохгүй байвал төсөл явахгүй.
Ингэснээр сууц өмчлөгчид шийдвэр гаргалтад чухал оролцоотой болсон гэсэн үг. Иргэдээ шийдвэр гаргах үйл явцад байнга оролцуулахыг зорьж байгаа.
-Гурван талт гэрээ хийхийн давуу тал иргэнд хэрхэн “наалдах” вэ?
-2016 онд Барилга хот байгуулалтын сайдын баталсан гурван талт гэрээний загвар бий. Үүний дагуу гэрээгээ байгуулмагцаа орон сууц ашиглалтад орох хүртэлх тодорхой хугацаанд түр суурьшуулах зардал авч болдог.
Мөн манай компанид харьяалагдаж байгаа орон сууцанд шинэ байраа хүлээх хугацаандаа түрээсийн төлбөр төлөөд амьдрах бололцоогоор хангадаг гэсэн боломжууд бий. Үндсэндээ тухайн иргэнийг яавал байраа чөлөөлөөд буцаад шинэ орон сууцанд орох хүртэл эрхийг нь доголдуулахгүй байх вэ гэдэг арга хэмжээг авдаг. Энэ мэтчилэн олон заалтууд бий.
-Амжилт хүсье!
сэтгүүлч
