Монгол Улсын Засгийн газрын “Чөлөөлье” санаачилгын хүрээнд Гэр бүл, хөдөлмөр, нийгмийн хамгааллын яам болон харьяа агентлагуудын нэгдсэн “Нээлттэй өдөрлөг” өнөөдөр нээлтээ хийлээ.

Гэр бүл, хөдөлмөр, нийгмийн хамгааллын сайд Т.Аубакир нээлттэй хаалганы өдөрлөгийг нээж, салбарын эрх зүйн шинэчлэл, цахим шилжилт, салбарын бодлого үйл ажиллагааны талаар танилцуулсан бол Нийгмийн даатгалын ерөнхий газрын дарга Б.Батжаргал Нийгмийн даатгалын шинэчилсэн хуулийн төслийн талаар иргэд, олон нийтэд мэдээлэл хүргэлээ.

Хоёр өдөр зохион байгуулагдах салбарын “Нээлттэй хаалганы өдөрлөг”-өөр Нийгмийн даатгалын байгууллагаас иргэд, даатгуулагч, ажил олгогч, харилцагчдад сайн дурын даатгал, шимтгэл төлөлт, тэтгэвэр, тэтгэмж тогтоолт олголт, баримт бичиг бүрдүүлэлт, нийгмийн хамгааллын салбарт хамтран ажиллах олон улсын хэлэлцээрийн хэрэгжилт, үр дүн, эрүүл мэндийн магадлалын үйл ажиллагаа, хөдөлмөрийн чадвар алдалтын хувь хугацаа тогтоох журмын талаар иргэд, даатгуулагчдад мэдээлэл, зөвлөгөө өгч ажиллах юм.

Үүнээс гадна иргэд, даатгуулагчдаас гаргасан санал хүсэлт, өргөдөл гомдлыг хүлээн авч, газар дээр нь нийгмийн даатгалын цахим программаар нийгмийн даатгалын үйлчилгээг үзүүлж байна. Нийгмийн даатгалын ерөнхий газар болон Баянзүрх, Сүхбаатар, Чингэлтэй, Хан-уул, Сонгинохайрхан, Баянгол дүүргийн Нийгмийн даатгалын албан хаагчид Нээлттэй хаалганы өдөрлөгийн эхний өдөр нийт 250 орчим иргэд, даатгуулагчдад нийгмийн даатгалын үйлчилгээг үзүүлж, мэдээлэл зөвлөгөө өгч ажиллалаа.

Гэр бүл, хөдөлмөр, нийгмийн хамгааллын салбарын “нээлттэй өдөрлөг” эхэллээ