Гэр бүл, хөдөлмөр, нийгмийн хамгааллын салбарын хууль эрх зүйн орчны шинэчлэл хийгдсэн мөн 11-р сарын 1-нээс иргэдэд суурь тэтгэвэр олгогдож эхэлнэ. Энэ талаар салбарын яам болон НДЕГ-аас /2026.10.26/ мэдээлэл өглөө.

Улсын Их Хурлаас 2026 оны 07 дугаар сарын 02-ны өдөр Нийгмийн даатгалын багц хуульд нэмэлт, өөрчлөлт оруулсан. Нийгмийн даатгалын багц хуульд орсон нэмэлт, өөрчлөлт нь ажил олгогч, даатгуулагчид харилцан өгөөжтэй байх, ажил гүйцэтгэх, хөлсөөр ажиллах гэрээгээр ажиллагчдын нийгмийн даатгалын шимтгэл төлөх нөхцөлийг уян хатан болгох, шимтгэлийн хөнгөлөлт, чөлөөлөлт үзүүлэх, нийгмийн даатгалын хамрах хүрээг өргөжүүлэхэд чиглэсэн.

Түүнчлэн, олон давхаргат тэтгэврийн тогтолцоонд шилжиж, тэтгэвэр авагч ахмад настны нийгмийн хамгааллын баталгааг сайжруулах, тэтгэврийн орлогыг нэмэгдүүлэх зорилгоор одоо авч байгаа тэтгэвэр дээр нь суурь тэтгэвэр нэмж олгох, олон жил шимтгэл төлөхийг урамшуулах, тэтгэвэр тогтоох нөхцөл, параметрт өөрчлөлт оруулах зэрэг шинэчлэлийг тусгасан.

Суурь тэтгэврийн талаар
Улсын Их Хурлаас 2026 оны 10 дугаар сарын 16-ны өдөр баталсан төсвийн тодотголоор Нийгмийн даатгалын сангийн 2026 оны төсвийн тухай хуульд өөрчлөлт оруулж, нийгмийн даатгалын сангаас болон цэргийн тэтгэвэр авагч ахмад настнууддаа 2026 оны 11 дүгээр сарын 01-ний өдрөөс суурь тэтгэвэр олгох нөхцөл бүрдээд байна.

Энэ талаар Гэр бүл хөдөлмөр нийгмийн хамгааллын сайд/ГБХНХ/-ын сайд Т.Аубакир мэдээлэл өглөө:
Тэрбээр “Нийгмийн даатгалын ерөнхий хуульд 2026 оны долдугаар сарын 2-нд нэмэлт, өөрчлөлт оруулсан. Ингэснээр Монгол Улс анх удаа олон давхаргат тэтгэврийн тогтолцоотой болж байна. Өмнө нь иргэд нийгмийн даатгалын шимтгэл төлж, нийгмийн даатгалын сангаас тэтгэвэр авдаг байсан бол одоо гурван эх үүсвэрээс тэтгэвэр авах боломж бүрдэж байна.

Нэгдүгээрт,

Нийгмийн даатгалын ерөнхий хуулиар Монгол Улсад анх удаа улсын төсвөөс шууд санхүүждэг суурь тэтгэврийг бий болгосон. Энэ нь иргэдийн ажилласан жилтэй уялдан 100-300 мянган төгрөгөөр нэмэгдэх бөгөөд бага орлоготой тэтгэвэр авагчдын орлогыг нэмэгдүүлэх зорилготой. Суурь тэтгэвэр нь ахмадуудын төлсөн шимтгэлээс бус, улсын төсөв буюу татвар төлөгчдийн мөнгөнөөс санхүүжиж, ахмад настнуудын орлогыг нэмэгдүүлэх бодлого юм.

Суурь тэтгэвэр авахад насны шаардлага тавина. Ахмад настны тухай хуулиар 55 нас хүрсэн эмэгтэй, 60 нас хүрсэн эрэгтэй хүн хамрагдана. Цэргийн тэтгэвэрт нас харьцангуй эрт гардаг. Тиймээс 55 нас хүрээгүй эмэгтэй, 60 нас хүрээгүй эрэгтэй цэргийн тэтгэвэр авагч суурь тэтгэврийн нэмэгдэлд тухайн үедээ хамрагдахгүй. Харин дараа нь насны шаардлага хангасан үедээ суурь тэтгэвэр авах эрх үүснэ.

Хоёрдугаарт,

иргэдийн төлсөн шимтгэл болон ажилласан жилтэй уялдуулан нийгмийн даатгалын сангаас олгодог үндсэн тэтгэвэр бий. Энэ төрлийн тэтгэврийг 2027 оны нэгдүгээр сарын 1-нээс 10 хувиар нэмэгдүүлнэ.

Гуравдугаарт,

Хувийн нэмэлт тэтгэврийн тухай хуулийн төслийг УИХ-аар хэлэлцэж байна. Хөдөлмөр эрхэлж буй залуучууд тэтгэвэрт гарах хүртлээ хувийн хуримтлал үүсгэснээр нэмэлт эх үүсвэрээс тэтгэвэр авах боломжтой болно.

Нийгмийн даатгалын тогтолцооны гол ачаалал нь ажил хөдөлмөр эрхэлж буй иргэдийн төлсөн шимтгэлээр тэтгэвэр авагчдын тэтгэврийг санхүүжүүлдэг зарчимд оршиж байна. Шимтгэл төлөгч болон тэтгэвэр авагчдын харьцаа таатай бус байгаа бөгөөд хүн амын насжилт нэмэгдэж буй энэ үед хөдөлмөр эрхлэгчдийг нийгмийн даатгалд хамруулахгүй бол тогтолцоо доголдох эрсдэлтэй” гэлээ.

Т.Аубакир: Суурь тэтгэврийн хүрээнд иргэдийн ажилласан жилтэй уялдан 100-300 мянган төгрөгөөр тэтгэвэр нэмэгдэнэ