УИХ-ын гишүүн Л.Мөнхбаатар Үй олноор хөнөөх зэвсэг дэлгэрүүлэхтэй тэмцэх ОУ-ын стратегийн худалдааны менежментийн тогтолцоо" семинарыг нээж үг хэлэхдээ урьдчилан сэргийлэх, стратегийн худалдааны хяналтын эрх зүйн орчныг боловсронгуй болгох асуудлаар мэдлэг, туршлагаа хуваалцахаар хүрэлцэн ирсэн олон улсын болон дотоодын байгууллагын төлөөлөгчдөд Улсын Их Хурлын Хууль зүйн байнгын хорооны нэрийн өмнөөс болон хувиасаа талархал илэрхийллээ.

Олон улсын аюулгүй байдлын орчин улам бүр ээдрээтэй болж буй өнөө үед цөмийн, химийн, биологийн зэвсэг, түүнийг хүргэх хэрэгсэл, холбогдох материал, технологийн тархалтаас урьдчилан сэргийлэх нь улс орнуудын хамтын хариуцлага юм. Ялангуяа иргэний зориулалттай бараа, бүтээгдэхүүн, технологийг хууль бус зорилгоор ашиглахаас сэргийлэхийн зэрэгцээ хууль ёсны худалдаа, хөрөнгө оруулалтыг дэмжсэн үр нөлөөтэй хяналтын тогтолцоо бүрдүүлэх шаардлагатайг онцоллоо.

НҮБ-ын Аюулгүйн Зөвлөлийн 1540 дүгээр тогтоолын хэрэгжилтийг хангах хүрээнд Монгол Улс стратегийн худалдааны хяналт, менежментийн эрх зүйн орчноо боловсронгуй болгож, үндэсний аюулгүй байдлыг бэхжүүлэхийн зэрэгцээ олон улсын худалдаанд итгэлцэл, найдвартай байдлыг нэмэгдүүлэх нь чухал юм.

Энэ хүрээнд стратегийн худалдааны хяналтын тухай хуулийн төслийг боловсруулахдаа олон улсын сайн туршлага, төрийн байгууллагуудын уялдаа холбоо, бизнесийн салбарын оролцоог хангаж, ил тод, ойлгомжтой, эрсдэлд суурилсан зохицуулалт бий болгох шаардлагатайг тэмдэглэв.

Семинарт Улсын Их Хурлын холбогдох байнгын хороодын гишүүд, АНУ-аас Монгол Улсад суугаа Элчин сайд Ричард Буанган, НҮБ-ын Зэвсэг хураах албаны Ази, Номхон далайн бүсийн зохицуулагч Аманда Ковл болон олон улсын байгууллагуудын төлөөлөгчид оролцож, стратегийн худалдааны хяналтын тухай хуулийн төслийн үзэл баримтлал, эрх зүйн зохицуулалт, хэрэгжүүлэх арга замын талаар санал солилцож байна.

Энэхүү семинарын үр дүнд олон улсын туршлага, мэргэжлийн байгууллагуудын санал зөвлөмжийг тусган, Монгол Улсын онцлог, хэрэгцээнд нийцсэн эрх зүйн орчныг бүрдүүлэх, төрийн байгууллагуудын хамтын ажиллагааг бэхжүүлэхэд бодит ахиц гарна гэдэгт итгэлтэй байгаагаа илэрхийллээ.

Үй олноор хөнөөх зэвсэг дэлгэрүүлэхтэй тэмцэх ОУ-ын стратегийн худалдааны менежментийн тогтолцоо" семинарыг нээж үг хэллээ