Баярцогт.С Ганхуяг.Д Бакей.А Батбаяр.Н Батцогт.Д Бурмаа.Р Зоригт.М Оюун.С 2012.08.24 | Хэвлэл мэдээллийн алба: УИХ

Орон нутгийн хурлын сонгуулийн тухай хуулийн төслийг өргөн барилаа

Өнөөдөр \2012.08.24\ УИХ-ын гишүүн  Д.Ганхуяг, С.Баярцогт, Н.Батбаяр, Д.Батцогт, М.Зоригт, С.Оюун, Р.Бурмаа, А.Бакей  нарын найман гишүүн Аймаг, сум, дүүргийн иргэдийн төлөөлөгчдийн хурлын сонгуулийн тухай хуулийн төслийг УИХ-ын даргад өргөн барилаа.

Уг төслөөр аймаг, сум, дүүргийн хурлын сонгуулийг УИХ болон Нийслэлийн иргэдийн Төлөөлөгчдийн 2012 оны ээлжит сонгуулийн нэгэн адил холимог хувилбараар явуулахаар зохицуулсан байна. Аймаг, сум, дүүргийн Хурлын нийт төлөөлөгчдийн гуравны хоёроос доошгүй нь сум, баг, хорооноос шууд, харин гуравны нэг хүртэл нь улс төрийн нам буюу намуудын сонгуулийн эвслийн жагсаалтаас тус тус сонгохоор тусгажээ.

Одоо хүчин төгөлдөр үйлчилж байгаа Орон нутгийн хурлын сонгуулийн тухай хуульд зааснаар улс төрийн нам нь сонгуульд эвсэл байгуулж оролцох бол намын Их хурал, эсхүл төлөөллийн төв байгууллагаар эвслийн гэрээг батлан сонгуульд эвсэл байгуулж оролцдог байсныг өөрчилсөн байна. Тодруулбал, орон нутгийн намын байгууллагууд тухайн нутагтаа эвсэл байгуулж сонгуульд оролцох эсэхээ шийдвэрлэснийг намын төлөөллийн төв байгууллага нь батламжилсны үндсэн дээр намын орон нутгийн байгууллагууд өөрсдөө бие даан шийдвэрлэж байхаар зохицуулалт хийсэн байна.

Сонгуульд оролцож байгаа нам, эвслийн хувьд тухайн шатны Хурлын төлөөлөгчдийн тооноос илүүгүй хүнийг нэг нэрийн жагсаалтаар нэгдсэн дараалалд оруулж дэвшүүлнэ. Санал хураалтын дүн гарахад тухайн сум, баг, хороонд оногдсон мандатын тоогоор хамгийн олон санал авсан нэр дэвшигчийг сонгогдсонд тооцож, үлдсэн суудалд нам, эвслийн авсан суудлын тоогоор намын жагсаалтын эхнээс нэр дэвшигч нь төлөөлөгчид сонгосонд тооцогдохоор заажээ.

Мөн сонгуулийн үйл ажиллагааны зардлыг улсын болон орон нутгийн төсвөөс гаргахаар төлөвлөж, тухайн орон нутаг өөрийнхөө сонгуулийг бие даан явуулахаар тусгасан зэрэг олон шинэ зүйлийг хуулийн төсөлд оруулсан байна.

0ЭКСПЕРТсэтгэгдэл
Сэтгэгдэл оруулахын тулд та хэрэглэгчийн эрхээр нэвтэрнэ үү.
Экспертүүдийн сэтгэгдэл
Одоогоор сэтгэгдэл нэмэгдээгүй байна.