Ганхуяг.Д 2013.06.07 | Хэвлэл мэдээллийн алба: УИХ

Газрын тосны тоног төхөөрөмж, сэлбэгийг НӨАТ-аас чөлөөлнө

Газрын тосны тоног төхөөрөмж, сэлбэгийг НӨАТ-аас чөлөөлнө
Хуулийн төслүүдийг хуралдаанд оролцсон гишүүдийн 74.5 хувийн саналаар батлав.

УИХ-ын чуулганы өнөөдрийн /2013.06.07/ үдээс өмнөх нэгдсэн хуралдаан түр завсарлаад үргэлжлүүлэн хуралдаж, гаалийн болон нэмэгдсэн өртгийн албан татвартай холбоотой зарим хууль, тогтоолын төслүүдийн эцсийн хэлэлцүүлгийг хийлээ.

Чуулганы нэгдсэн хуралдааны завсарлагаар Төсвийн байнгын хороо хуралдаж, Засгийн газраас өргөн мэдүүлсэн эдгээр хууль, тогтоолын төслүүдийг эцсийн хэлэлцүүлэгт бэлтгэсэн юм.

Нэгдсэн хуралдаанаар Гаалийн болон нэмэгдсэн өртгийн албан татвараас чөлөөлөх тухай хуулийн төсөл /Газрын тосны бүтээгдэхүүнийг гарган авах төслийн хүрээнд импортоор оруулж байгаа технологийн тоног төхөөрөмж, сэлбэгийг гаалийн болон нэмэгдсэн өртгийн албан татвараас чөлөөлөх тухай/-ийн эцсийн хэлэлцүүлгийг хийлээ.

Байнгын хороо хуулийн төслүүдийг тусад нь Гаалийн албан татвараас чөлөөлөх тухай, Нэмэгдсэн өртгийн албан татвараас чөлөөлөх тухай гэсэн хоёр хууль болгож батлах зарчмын зөрүүтэй санал гаргасныг нэгдсэн хуралдаанаар дэмжлээ.

Ингээд хуулийн төслүүдийг хуралдаанд оролцсон гишүүдийн 74.5 хувийн саналаар батлав.