Ганхуяг.Д Оюунхорол.Д Эрдэнэчимэг.Л Батхүү.Ц 2015.10.02 | Сонин: Өдрийн сонин

“Амгалан” амаржих газрын нээлт болов

“Амгалан” амаржих газрын нээлт болов
“Амгалан” амаржих газрын нээлт

Монгол Улсын Их Хурлын дарга Зандаахүүгийн Энхболд Баянзүрх дүүргийн “Амгалан” амаржих газрын шинэ байрны нээлтийн ёслолд  оролцов.

Нээлтийн ёслолын үеэр Улсын Их Хурлын дарга З.Энхболд хэлсэн үгэндээ, Монгол Улс эх, нярайн эрүүл мэндийг сайжруулах, эндэгдлийг тогтвортой бууруулж, төрөлтийг дэмжих бодлого, арга хэмжээг тууштай хэрэгжүүлж байгаа. Үүний үр дүнд төрөлтийн тоо сүүлийн жилүүдэд хурдтай нэмэгдэж байгаа.

Эх нярайн тусламж үйлчилгээний чанар, хүртээмж сайжирч, эхийн эндэгдлийг 1990 онтой харьцуулахад 6 дахин бууруулж чадлаа. 150 ортой “Амгалан” амаржих газрын шинэ барилга ашиглалтад орсоноор Баянзүрх дүүргийн эхчүүдэд ая тухтай, эсэн мэнд амаржих таатай орчин бүрдэж байгаа төдийгүй эмч, сувилагчдын ажиллах нөхцөл ч сайжирна гэлээ.

Түүнчлэн тус амаржих газрыг ашиглалтад оруулахтай холбогдсон төсөв хөрөнгийг шийдвэрлэхэд тус дүүргээс сонгогдсон УИХ-ын гишүүн Д.Арвин, Д.Ганхуяг, Ж.Батзандан нар багагүй хүчин чармайлт гаргасаныг онцлон тэмдэглэв.

“Амгалан” амаржих газрын нээлт

Тус амаржих газар 1966 оноос одоог хүртэл  172  мянган эхийг эсэн мэнд амаржуулсан бөгөөд эмч, эмнэлгийн мэргэжилтнүүдийн 35.8 хувь нь мэргэшлийн болон эрдмийн зэрэг цолтой, 42 хувь нь эрүүл  мэндийн салбарын  тэргүүний ажилтан ажилладаг байна. Баянзүрх дүүргийн III хороонд байрлах амаржих газрын шинэ байр нь 9000 ам.метр талбайд 412 өрөө, 150 ортойгоор үйл ажиллагаагаа явуулах юм байна. 7 давхар төрөх эмнэлгийг Япон Улсын Засгийн газрын 1.5 сая ам.долларын буцалтгүй тусламжийн хөрөнгөөр орчин үеийн тоног төхөөрөмж, аппаратаар тохижуулжээ. Тус эмнэлэг ачаалал ихтэй үед орны тоогоо 100-аар нэмэгдүүлэх боломжтой болохыг эмнэлгийн удирдлагууд нээлтийн арга хэмжээний үеэр танилцуулж байлаа.

Үүний дараа УИХ-ын дарга болон УИХ-ын гишүүд эмнэлгийн байртай танилцан, тоног төхөөрөмжийг нь үзэж сонирхлоо. Энэ үеэр УИХ-ын дарга З.Энхболд “Өнөөдөр Баянзүрх дүүрэгт төрөх, эмэгтэйчүүдийн эмнэлгийн шинэ байр ашиглалтад орж байна. Улсын төсөв хүндэрсэн шалтгаанаар төсөв нь царцаад, орох ёстой хугацаандаа ашиглалтад орж чадаагүй.

Гэхдээ Улсын Их Хурал царцсан төсвүүдээс хамгийн чухал нь  төрөх эмнэлгийн асуудал гэж үзэж, зөвхөн энэ обьектыг дуусгаж, ашиглалтад оруулж байгаа. Баянзүрх дүүргийн хуучин төрөх эмнэлэг жилд 6000 эх хүлээж авдаг байсан бол одоо 20000 эхэд эмнэлгийн үйлчилгээ үзүүлэх боломжтой байна. 20000 гэдэг бол Улаанбаатар хотын нийт төрж байгаа эхчүүдийн 50 хувь нь юм. Үүнээс энэ эмнэлгийн хүчин чадал, ач холбогдол нь тодорхой харагдана.

Тус эмнэлэгт 1.5 сая ам.долларын өртөг бүхий Япон Улсын сүүлийн үеийн төрөх эмнэлгийн тоног төхөөрөмж суурилуулсан. ЭНЭШҮТ-д цөөхөн байдаг, хүртээмж муутай аппаратыг “Амгалан” төрөх эмнэлэгт 10 гаруйг суурилуулсан байна. Тоног төхөөрөмж болон барилгын дизайн, шаардлага нь орчин үед нийцсэн. Ямартай ч  “Амгалан” төрөх эмнэлэг 300 хүүхдийн ортой эх, нялхсын шинэ төвийг ашиглалтад орох хүртэл нийт ачааллын хагасыг нь авах хүчин чадал, нөөц бололцоотой.

2011 онд тус эмнэлгийн шавыг тавьсан ч 2012, 2013 онд төсвийг нь царцаан, дахин санхүүжүүлэхгүй гэж байхад Улсын Их Хурлын эмэгтэй гишүүд ихээхэн хүчин чармайлт гаргасан. Мөн Баянзүрх дүүргээс сонгогдсон Улсын Их Хурлын гурван гишүүн идэвх зүтгэл гаргасны үр дүнд өнөөдөр амаржих эмнэлгийн шинэ байр ашиглалтад орж байна” гэв.

“Амгалан” амаржих газрын нээлт

Нийслэлийн хамгийн олон хүн амтай буюу 330 мянга гаруй хүн амтай тус дүүрэгт харьяалагдах гуравдугаар амаржих газар өмнө нь 45 ортой төрөх эмнэлэгт эхчүүдээ хүлээн авдаг байв. Харин “Амгалан” амаржих газар шинэ байрандаа орсноор хүчин чадал нь гурав дахин нэмэгдэж байгаа талаар тус эмнэлгийн ерөнхий  эмч Д.Бат-Очир хэлж байлаа. Түүнчлэн дүүргийн хэмжээнд охид, эмэгтэйчүүдийн өвчлөл, жирэмслэлт, нөхөн үржихүйтэй  холбоотой оношлогоо, эмчилгээ, сувилгаа, мэс засал, нөхөн сэргээх шинэ төрлийн эмчилгээнүүдийг нэвтрүүлэх боломж бүрдсэн болохыг дуулгав.

Улсын Их Хурлын гишүүн Д.Арвин хэлэхдээ "Энэ төрөх эмнэлэг одоогоор 150 ортой байгаа ч 250 ортой байх зураг төслөөр барилгын ажил хийгдсэн. Нэлээд хугацаанд багагүй асуудлыг туулж байж энэ эмнэлэг өнөөдөр ашиглалтад орж байна. Энэ Улсын Их Хурал төрөх эмнэлгийн шаардлага, ач холбогдлыг үнэлж, хөрөнгө оруулалтыг шийдэж өгсөн. Төрөх эмнэлгийн асуудалд анхаарал хандуулж, шийдэж өгч байгаа нь Монголын ээжүүд, эмэгтэйчүүд, хүүхдүүдийг дэмжиж байгаагийн илрэл гэж би үзэж байна” гэлээ.

/TV5 ТВ/

“Амгалан” амаржих газар нь Баянзүрх дүүргийн иргэдэд төдийгүй нийслэлийн хэмжээнд үйл ажиллагаа явуулж, төрөх эхчүүдийг хүлээн авч эмчилгээ, үйлчилгээ үзүүлнэ гэдгийг Улсын Их Хурлын гишүүн Ж.Батзандан онцолж хэлсэн юм. Нийслэлд өдөрт дунджаар 200 эх амарждаг бөгөөд “Амгалан” амаржих газар  шинэ байртай болж, хүчин чадлаа нэмэгдүүлснээр нийслэлийн хэмжээнд төрөх эмнэлгийн эмчилгээ, үйлчилгээний чанар, хүртээмжийг нэмэгдүүлэхэд нөлөө үзүүлнэ.

Бүх тоног төхөөрөмж нь сүүлийн үеийнх, эмч, мэргэжилтнүүд нь сургалтад хамрагдсан болохоор эх, хүүхдийн эрүүл мэндийг хамгаалах тал дээр дэвшил гарна. УИХ, Засгийн газрын зүгээс энэ асуудалд ихээхэн анхаарал тавьсан гэдгийг хэлэх нь зүйтэй. Ирэх онд ашиглалтад орох 300 ортой шинэ төрөх эмнэлэг баригдаж байгаа. Ингэснээр Улаанбаатар хотын хэмжээнд төрөх эмнэлгийн хүртээмжийн асуудал бүрэн шийдэгдэх болно гэв.

Нийслэлийн Баянзүрх дүүргийн “Амгалан” амаржих эмнэлгийн шинэ байрны нээлтийн ёслолд Улсын Их Хурлын гишүүн Д.Арвин, Ж.Батзандан, Д.Ганхуяг, Д.Оюунхорол, Г.Уянга, Л.Эрдэнэчимэг болон албаны бусад хүмүүс оролцов