Сансар хотхоны иргэдийг орон сууцаар хэрхэн хангах талаарх саналаа УИХ-ын гишүүн, Эдийн засгийн байнгын хорооны дарга Д.Ганхуяг Барилга, хот байгуулалтын сайд Ц.Цолмонд хүргүүлжээ.

Уг бичигт дурдахдаа "Бизнесийн чанартай орон сууц шинээр барих, худалдах ажилд төр оролцох шаардлагагүй бөгөөд харин төрийн албан хаагчид болон бага, дунд орлоготой иргэд орон сууцтай болохыг дэмжих зорилгоор хүн амын худалдан авах чадвартай уялдсан боломжийн хямд үнээр иргэдийг орон сууцжуул-даг олон арга зам бүхий бусад орны туршлага байдаг. "40000 айлын орон сууц" хөтөлбөрийн хүрээнд баригдах нийгмийн чанартай орон сууц хөтөлбөрт Баянзүрх дүүргийн нутаг дэвсгэрт шинээр баригдах 14 дүгээр хороолол буюу одоогийн Баянзүрх дүүргийн 13,14 дүгээр хорооллын газраа хувьчилж авсан, дэд бүтэц нь ший-дэгдсэн айл өрхүүдийг хамруулах боломжтой гэж үзэж байна.

Мөн иргэдийг хямд орон сууцаар хангахын тулд урьдчилгаа төлбөрийн тодорхой хувийг төрөөс татаас хэлбэрээр олгох, банкны зээлийн хүүд хөнгөлөлт үзүүлэх, хямд өртөгтэй нийтийн зориулалттай орон сууцыг төрийн санхүүжилтээр барьж ядуу иргэдэд түрээслүүлэх, гэр хорооллын айлуудын хувьчлагдсан газарт урьдчилсан гэрээ хэлэлцээрийн үндсэн дээр орон сууц барьж тэдгээр айл өрхүүдийн орон сууцны асуудлыг шийдэх зэрэг олон арга хэлбэрийг ашиглан иргэдийг нийгмийн чанартай орон сууцаар хангах боломж байна. Тухайлбал, 40 айлын хувьчлагдсан газрыг орон сууцаар солих тохиролцоо хийж, уг газрын гуравны нэгтэй тэнцэх хэмжээний газарт барьсан орон сууцаар тухайн 40 айлыг сууцжуулаад, үлдэх газарт нь орон сууц болон бусад барилга байгууламжуудыг барихад гарах ашиг нь иргэд, гүйцэтгэгч нарт аль алинд нь харилцан ашигтай байх зарчмаар иргэдийг орон сууцжуулах боломжийг сайтар судлан үзэж хэрэгжүүлэх, ийм нөхцөлөөр орон сууц барих компаниудыг уралдаант шалгаруулалтаар сонгох замаар орон сууц хөтөлбөрийг хэрэгжүүлэх шаардлагатай байна. Эдгээр арга замаар Сансар хотхонд оршин суугч иргэдийг нийтийн чанартай орон сууцны хөтөлбөрт хамруулах асуудлыг судлан шийдвэрлэж, хариу мэдэгдэхийг Танаас хүсье" гэжээ.