УИХ-ын чуулганы үдээс өмнөх хуралдаанаар  Ард нийтийн санал асуулгын тухай хуулийг хэлэлцлээ.

Уг хуулийн төслийг 2016 оны нэгдүгээр 14-ны өдөр өргөн барьсан. Хууль санаачлагчийн илтгэлийг УИХ-ын гишүүн Н.Батбаяр, Төрийн байгуулалтын байнгын хорооны дүгнэлтийг УИХ-ын гишүүн Х.Тэмүүжин нар тус тус  танилцууллаа.

Хуулийн төслийг хэлэлцэх үеэр УИХ-ын зарим гишүүд байр сууриа илэрхийлсэн юм.

УИХ-ын гишүүн О.Баасанхүү “Нийгэм хямарчихлаа. Хамгийн эхний ард нийтийн санал асуулгаар УИХ тарах уу, үгүй юу гэдгийг асуух боломжтой юу? Хэрэв боломжтой гэвэл би хэлэлцэх эсэхийг нь дэмжмээр байна. Ард түмнээс асууя гэдэг нь буруу биш байх. Гэхдээ цөөн зүйл асууна гэвэл утгагүй болох гээд байна”

УИХ-ын гишүүн Ө.Энхтүвшин “Үндсэн хуулинд өөрчлөлт оруулах гэсэн арга мухардахад арай өөр байдлаар оруулж ирсэн хууль гэж харж байна. 1995 онд батлагдсан хуулийг амьдрал дээр нэг ч удаа хэрэгжүүлж үзээгүй. Тиймээс хуулийн сайн, муу болж байгаа үгүйг нь хэлэхэд хэцүү. Шинэчилсэн найруулга гэлгүйгээр нэмэлт өөрчлөлт байдлаар оруулж ирвэл болохгүй юм уу? Хэд, хэдэн ноцтой зүйл бий. Ард иргэдээс асуусан болж харагдаад, УИХ-д буй 76 гишүүн Үндсэн хуулийг дураар өөрчлөх боломж бүрдэх гээд байна” гэлээ.

Харин УИХ-ын гишүүн Д.Сумъяабазар хууль санаачлагч Н.Батбаяр гишүүнд хандан “Ард нийтийн санал асуулгын тухай хуулиа татаад авчихаач ээ гэж хүсмээр байна. УИХ-д хийж, хэрэгжүүлж, батлах маш олон ажлууд бий. Олон хүний аж амьдралтай холбоотой олон хуулийн төслүүд хүлээгдэж байна. Танд энэ хуулийг 2016 оны сонгуулийн дараа хэлэлцүүлэх бүхий л боломжууд нээлттэй.  Цаг хугацааны хувьд давчуу байхад уг хуулийн төслийг шийдэх нь зохимжгүй гэж бодож байна. МАН-ын гишүүд хуулийг хэлэлцэхээс татгалзан, цэрвээд байгаа зүйл байхгүй” 

УИХ-ын гишүүн С.Бямбацогт “Ард нийтийн санал асуулга явуулахыг дэмжиж байна. Өөрчлөлт оруулах ёстой, ард нийтээсээ асуудаг байх нь зөв. Иргэдийг бодитой, нэг бүрчлэн санал асуулгад оролцох бололцоог нь хангаад хариуцлагагүй байдлаас татгалзах зүйл, заалтууд оруулж болохгүй юу? Ард түмнээс илээр болон нууцаар санал хураана гэсэн байна. Нууцаар болон гар утас цахимаар санал авна гэдэг заалтуудыг татаад авчихвал хуулийн төслийг дэмжинэ” гэлээ.

Үдээс хойшхи санал хураалтаар үргэлжилнэ.