Нөхөр Рональд Рейганы Холливудын жүжигчний карьераас Калифорни мужийн сайд төдийгүй Цагаан ордон хүртэлх аялалд түүний нэр хүнд, дүр төрхийг сайтар хамгаалж байсан. Заримдаа Нэнси өөрийгөө ч золиосонд гаргадаг байлаа.

Ерөнхийлөгч Р.Рейганы дотны анд Майкл К.Дейвер “Нэнсигүйгээр мужийн захирагч Рейган, ерөнхийлөгч Рейган гэдэг хүн оршин байхгүй” гэж хэлсэн нь үүнийг батлан харуулах мэт.

Тэд хүү, охин хоёртой...

Хатагтай Рейган 1976 оны Бүгд найрамдах намаас ерөнхийлөгчийн сонгуульд нэр дэвших кампанит ажил болон 1980 оны ерөнхийлөгчийн сонгуулийн кампанит ажлын үеэр ихээхэн үүрэгтэй оролцож байсан.

Мөн ерөнхийлөгч Р.Рейганыг Иран улсад нууцаар зэвсэг зарахыг зөвшөөрсөн хэрэг олонд дэлгэгдэх үеэр түүний нэр хүндийг сэргээх ажилд хамгийн өндөр үүрэгтэй оролцжээ. Хатагтай Нэнси гөжүүд нөхрөө АНУ-ын иргэдээс уучлалт гуйхыг ятгаж чадсан. Ерөнхийлөгч Р.Рейган 1987 оны гуравдугаар сарын 4-ний өдөр орон даяар уучлалт хүссэн илтгэл телевизээр шууд цацагдсанаар нэр хүнд нь хурдацтай өссөн билээ.

...Хатагтай Н.Рейган хийсэн бүхнийхээ гавьяаг хүртэхийг хүсддэггүй, бусдад мэдэгдэхийг ч хүсдэггүй байсан. “Ерөнхийлөгчийн суудал ганхахгүй, бат зогсож чаддаг хүчирхэг эмэгтэй” гэсэн нэрээр нөхрийнхөө алдар хүндийг сарниулахыг огтоос хүсдэггүй эмэгтэй юм...

Тэрээр олны өмнө өөрийгөө “Нөхрийнхөө карьерын төлөө Холливудын жүжигчний карьераас татгалзсан жаргалтай эмэгтэй” гэж хэлээд нөхрөө хайрын харцаар хардаг байв. 1989 онд хэвлэгдсэн “Миний эргэлт. Нэнси Рейганы намтар” нэртэй номондоо “Миний эр хүнээс хүсдэг бүхэн түүнд байсан” хэмээн бичжээ.

Түүний нөхөр алцгеймерын өвчнөөр 2004 оны зургадугаар сарын 5-нд насан өөд болсон. “Энэ үед Нэнси “Тэдний гэр бүлийн үлдээх хамгийн үнэт өв бол бусад бусад гэр бүлүүдэд ийм гунигт зүйл тохиолдохоос сэргийлэх” гэж үзжээ.

Тэд хэрхэн учирсан бол

Нөхөртэйгээ болзох анхны болзоог Нэнси Дэвис өөрөө санаачилсан.

1940 оны сүүл үед Засгийн газраас дэлгэцийн урлагийг коммунист нөлөөг түгээж байна хэмээн буруутгаж, шалгалт хийж байв. Гэтэл 1949 оны аравдугаар сард хар жагсаалтад орсон хоёр кинонд тоглосныхоо төлөө Нэнси Дэвисийн нэр сонинд бичигдсэн байна.

Уг явдал түүний жүжигчний карьерыг дуусгаж мэдэхээр байсан учраас Р.Рейгантай уулзаж, энэ бүх асуудлаа цэгцлэх зорилготой байжээ. Тэд Холливудын алдарт ‘Ларүе ресторан’-д оройн зоог барьжээ. Буяны бэйсболлын тоглолтын үеэр зүүн хөлний яс нь цуурсан учраас Р.Рейган болзоондоо суга таягтай иржээ.

Хатагтай Дэвис түүнийг хараад шууд л дурласан гэдэг. Харин Р.Рейган илүү няхуур хандсан аж. Учир нь 1948 онд салсан хуучин эхнэртэйгээ буцаж нийлнэ гэж найддаг байжээ.

Тэд 1949 оны намар хэд хэдэн удаа болзож, удалгүй салсан боловч 1950 оноос дахин уулзалдаж эхэлсэн. Ингээд тэд 1952 оны гуравдугаар сарын 4-ний өдөр нууцаар хуримаа хийсэн юм.

Үнэнч дэмжигч

Хатагтай Н.Рейган нөхрөө улс төрд хүчин зүтгэхэд нь таатай санаддаггүй байсан ч түүнийг үнэнчээр дэмждэг байсан. 1964 оны аравдугаар сарын 27-ны өдөр Бүгд найрамдах намаас нэр дэвшигч Барри Голдвотерт хэлсэн үг нь орон даяар телевизээр цацагджээ.

Ингэснээр түүний улс төрийн карьер тэнгэрт хөөрөхөд бэлэн болсон. Үүнээс нэг жилийн дараа Өмнөд Калифорниас бүлэг баячууд Р.Рейган дээр ирж, Калифорни мужийн захирагч болох санал тавьжээ. Рейган ч уг саналыг ихэд сонирхон хүлээн авсан юм.

Р.Рейган 1976 оны ерөнхийлөгчийн сонгуульд ялагдсан ч 1980 онд дахин хүч үзэж, АНУ-ын ерөнхийлөгчийн суудалд заларсан билээ. Тус хоёр сонгуулийн кампанит ажлыг зохион байгуулах үеэр зөвлөхүүд нь олонтаа солигдсон. Энэ сэлгээний ажилд хатагтай Н.Рейган гар бие оролцсон юм.

Хатагтай Н.Рейганы хувийн замнал

Хатагтай Н.Рейган АНУ-ын тэргүүн хатагтай байх үедээ Америкаар тойрон аялал хийж, хар тамхи болон согтууруулах ундааны эсрэг сурталчилгаа явуулж, эсэргүүцэж байсан.

1987 оны аравдугаар сард хатагтай Н.Рейган хорт хавдартай болох нь тогтоогдож, зүүн хөхөө тайруулах хагалгаанд орсон.

Тэрээр хагалгааны дараа эмэгтэйчүүдтэй нээлттэй хэлэлцүүлэг өрнүүлж, жил бүр маммограмын шинжилгээ өгч байхыг уриалдаг байсан.

Мөн Ерөнхийлөгчийн суудлаас буусан Р.Рейган 1994 онд Алцгеймерын өвчинтэй болсноо мэдсэнээс хойш нөхрийгөө арван жилийн туршид өдөр шөнөгүй асарч, найзуудтайгаа өдрийн хоол идэхдээ яаран сандарч, нөхрийнхөө туссан өвчнийг эмчлэх судалгааны ажлыг идэвхтэй дэмжиж байсан юм.

...Тэрээр нөхөр Р.Рейганы оршуулгын ёслолын үеэр сэтгэл хөдлөлөө дээд зэргээр барьсан. Нар ч жаргаж, оршуулах ёслол дуусах дөхөх үед Нэнси Рейган цурхиртлаа уйлсан юм...

АНУ-ын 40 дэх тэргүүн хатагтай Нэнси Рейган 94 насандаа таалал төгсчээ. Нэнси Рейган бол АНУ-ын түүхэн дэх хамгийн нөлөө бүхий төдийгүй загварлаг тэргүүн хатагтай байсан юм. Мөн нөхөр Роналд Рейганыг амьдралынхаа төв болгож чадсан эмэгтэй байжээ.

Америкийн нөлөө бүхий тэргүүн хатагтай Нэнси Рейган