УИХ-ын гишүүн Д.Оюунхорол чуулганы хуралдаанаар Боловсролын тухай хуульд нэмэлт, өөрчлөлт оруулах тухай хуулийн төсөлд хоёр санал оруулах талаар байр сууриа илэрхийллээ.

Тэрээр хуулийн төслийн 10.3-т бүх шатны боловсролын хөтөлбөрт “гэр бүлийн боловсрол” гэсэн үгийг нэмж тусгах санал оруулсан юм.

Д.Оюунхорол гишүүн хэлэхдээ "Өндөр хөгжилтэй, нийгмийн хамгаалал сайтай гэгдэж байгаа бүх орнуудын сургалтын хөтөлбөрт нь гэр бүлийн боловсрол бүгдэд нь ордог. Бид өндөр боловсролтой чадварлаг боловсон хүчин гэж ярьдаг ч иргэнээ төлөвшүүлэх, монгол хүн бий болгох асуудлаа орхигдуулж ирсэн. Залуучууд, охид хөвгүүд маань гэр бүлд бэлтгэгдээгүйгээс өнөөдөр гэр бүлийн үнэт зүйл алдагдаж, гэр бүлийн задрал хурдацтай явагдаж байна гэдгийг судалгааны байгууллагуудын дүн харуулж байна. Өнөөдөр найман гэр бүл тутмын нэг нь хамтран амьдрагч болж, 10 гэр бүл тутмын 3-ыг эмэгтэйчүүд өрх толгойлж, гэр бүлийн халуун дулаан орчинд өсөж, торних боломжгүй хүүхдийн тоо нэмэгдсээр байна. Тиймээс энэ гэр бүлийн боловсролын асуудалд анхаарах хэрэгтэй байна" гэлээ.

Мөн тэрээр сурагчдын амралтыг нэг өдөр эхлүүлээд нэг өдөр дуусгадаг болгох санал гаргалаа. Түүнийг чуулганы завсарлагаанаар сонгогдсон тойрог Завхан аймгийнхаа зарим сумдад ажиллах үеэр ерөнхий боловсролын сургуулийн сурагчдын улирлын амралт бага дунд, ахлах ангиараа ялгаатайгаар өөр өөр өдөр эхлэж, өөр өөр өдөр дуусаж байгаа нь төв суурин газраас алслагдсан малчдад хүндрэл учруулж байгааг энэ үеэр уламжлав. Малчид хүүхдүүдээ бараг сарын турш нааш цааш нь зөөх хэрэг гарч байгаа учраас сурагчдын амралтыг нэг өдөр болгож зохицуулах санал гаргажээ.

Гэр бүлийн боловсролын асуудлыг хуулийн төсөлд тусгая

Гэр бүлийн боловсролын асуудлыг хуулийн төсөлд тусгая