Монголын Мэргэшсэн Нягтлан Бодогчдын Институт үүсгэн байгуулагдсаны 20 жилийн ойг тохиолдуулан Монгол Улсынхаа өнцөг булан бүрт ажиллаж амьдарч байгаа нийт санхүүчид, нягтлан бодогчид, аудиторууд болон олон мянган гишүүд, дэмжигчиддээ баярын мэндчилгээ дэвшүүлье.

ММНБИ-ийн хамт олон, гишүүд, дэмжигчидийнхээ хамтаар нягтлан бодох бүртгэл, аудитын олон улсын тогтолцоог үүсгэн төлөвшүүлж хөгжүүлэх, хууль эрх зүйн үндсийг тавих, Нягтлан бодох бүртгэлийн болон Аудитын олон улсын стандартыг нэвтрүүлэх, нягтлан бодогч, санхүүчдийнхээ мэдлэг боловсрол, мэргэжлийн ур чадвар дээшлүүлэхэд бодитой хувь нэмэр оруулсаар ирсэн билээ.
Тус институт мэргэшсэн нягтлан бодогчдыг бэлтгэх, давтан сургах, тасралтгүй боловсрол олгох, мэргэжлийн ёс зүйг сахиулах, Нягтлан бодох бүртгэлийн тухай хууль, Аудитын тухай хуулиудыг боловсронгуй болгох, Нягтлан бодох бүртгэлийн болон Аудитын олон улсын стандартыг орчуулан гаргах, хэрэглээний тайлбар, аргачлалаар хангах зэрэг эрх зүйн шинэчлэлтийг тасралтгүй хийж нягтлан бодох бүртгэл, санхүү, аудитын салбарт ажиллаж байгаа төр засаг, аж ахуй нэгж, байгууллагын мэргэжилтнүүд, санхүүгийн удирдлагыг хэрэгжүүлж байгаа ажилтнууд, тус чиглэлээр суралцаж байгаа оюутнуудад мэргэжлийн мэдлэг мэдээллээр хангах, арга зүйн зөвлөгөө өгөх үйл ажиллагааг амжилттай явуулсаар байна.

ММНБИ Ази, Номхон Далайн Нягтлан Бодогчдын Холбоо (САPA), Дэлхийн Нягтлан Бодогчдын Холбоо (IFAC)-нд жинхэнэ гишүүн болсноор Олон улсын нэр хүнд бүхий эдгээр байгууллагуудад Монгол Улсаа төлөөлж, гадаадын мэргэжлийн байгууллагуудтай хамтын ажиллагаагаа жилээс жилд өргөжүүлж Олон улсын мэргэжилтэн бэлтгэх ACCA-ийн хөтөлбөр сургалтыг эхлүүлсэн зэрэг гадаад харилцаа хамтын ажиллагааны хүрээнд амжилттай ажиллаж байна.
ММНБИ үүсэн байгуулагдсан 20 жилийн ойн баярыг улс орон даяар тэмдэглэж байгаа гишүүд дэмжигчиддээ болон бидний үйл ажиллагааг байнга дэмжин ажиллаж байдаг төр захиргаа, шинжлэх ухаан боловсрол, эрдэм шинжилгээ, сургалт судалгааны байгууллагууд, мэргэжлийн үйлчилгээг байнга авч байдаг аж ахуй нэгж байгууллагууд тэдгээрийн хамт олон, Монгол Улсынхаа нийт иргэдэд ажлын амжилт, эрүүл энх, аз жаргал, сайн сайхан бүхнийг хүсэн ерөөе.

Хүндэтгэсэн,

Монголын Мэргэшсэн Нягтлан Бодогчдын Институтийн

Ерөнхийлөгч Ц.Жигдэн
Гүйцэтгэх захирал Чой.Чимидсүрэн

Баярын мэндчилгээ