МАН сонгуулиар үнэмлэхүй ялалт байгуулсан. Одоо тэд мөрийн хөтөлбөрт тусгасан "Мэргэжлийн Засгийн газар"-аа байгуулах ёстой.

Одоогоор МАН-ынхан шинээр бүрдэх Засгийн газраа Ерөнхий сайдыг оролцуулаад 17 сайд, 13 яамтай байхаар төлөвлөж хуулийн төслийг боловсруулсан тухай мэдээлэл бий.

Тодруулбал, Монгол Улсын Ерөнхий сайд, Шадар сайд, Монгол Улсын сайд,  Монгол Улсын Засгийн газрын хэрэг эрхлэх газрын дарга, Байгаль орчин, аялал жуулчлалын сайд, Гадаад харилцааны сайд,  Сангийн сайд, Хууль зүй, дотоод хэргийн сайд, Хөдөлмөр, нийгмийн хамгааллын сайд, Батлан хамгаалахын сайд, Барилга хот байгуулалтын сайд, Боловсрол, соёл, шинжлэх ухаан, спортын сайд, Зам тээврийн сайд, Уул уурхай, хүнд үйлдвэрийн сайд, Хүнс хөдөө аж ахуй, хөнгөн үйлдвэрийн сайд, Эрчим хүчний сайд, Эрүүл мэндийн сайд гэсэн 17 сайдтай байхаар шийдсэн сурагтай.

Үүнээс Байгаль орчин, аялал жуулчлалын яам, Гадаад харилцааны яам, Хууль зүй дотоод хэргийн яам, Сангийн яам, Эрүүл мэндийн яам, Хөдөлмөр, нийгмийн хамгааллын яам ерөнхий чиг үүргийн яам болгохоор шийдсэн аж.

Харин Батлан хамгаалах, Барилга хот байгуулалтын яам, Боловсрол, соёл, шинжлэх ухаан спортын яам, Зам тээврийн яам, Уул уурхай, хүнд үйлдвэрийн яам, Хүнс хөдөө аж ахуй, хөнгөн үйлдвэрийн яам чиглэлийн яамд байх гэнэ.

Энэхүү зураглалын дагуу бол Хөдөлмөрийн яамыг Нийгмийн хамгааллын яамтай нэгтгэх бол Аж үйлдвэрийн яамыг хоёр хувааж, хүнд үйлдвэрлэлийн салбарыг нь Уул уурхайн яаманд, хөнгөн үйлдвэрлэл нэрийн дор жижиг дунд үйлдвэрлэлийг Хүнс хөдөө аж ахуйн сайдад хариуцуулахаар болсон нь харагдаж байна.

Тэгвэл МАН-ынхны хэлээд буй "Мэргэжлийн Засгийн газар"-ын ерөнхий чиг үүргийн яамдын сайдууд давхар алба хаших ёстой. Учир нь УИХ-ын гишүүд ерөнхий чиг үүргийн яамдын сайдын албыг давхар хаших нь ажил үүргээ гүйцэтгэхэд амар дөхөм байдаг гэдгийг Ерөнхий сайд Ж.Эрдэнэбат хэлж байсан. Тэгэхээр чиглэлийн яамдын сайдад ямар хүмүүс яв цав тохирохыг ард түмэн аль хэдийнэ шийдчихжээ.

Тухайлбал,  Байгаль орчин, ногоон хөгжил, аялал жуулчлалын яамыг Үндэсний цэцэрлэгт хүрээлэнг өнөөгийн дүр төрхөнд нь оруулж, өөд нь татаж чадсан Б.Саранчимэгт  "өрсөлдөгчгүй"-гээр өгөх нь зөв хэмээн учир мэдэх хүмүүс хэлж байна.

Харин Гадаад харилцааны яаманд Д.Цогтбаатар шиг боловсрол өндөртэй, ёс зүйтэй, ажлын туршлагатай хүн очих ёстой гэдгийг дуулгаж байна. Тэр Гадаад хэргийн яамыг толгойлж, улсынхаа нэрийн хуудас болж чадах бөгөөд дипломат албанд нэвтэрхий, ёстой л мэргэжлийн байж чадах цөөн хүний нэг гэдгийг улс төрийн хүрээнийхэн онцолж байна.

Хууль зүй дотоод хэргийн яамыг Төрийн хар хүн гэгддэг Ц.Нямдоржид өгөх нь тун сайн сонголт хэмээн хүмүүс хэлж байгаа юм. Шулуухан үгтэй, басхүү төрийн албанд тэр дундаа төрийн өндөр албан тушаалыг олон жил хашсан Ц.Нямдорж энэ албыг төвөггүйхэн хаших нь ойлгомжтой.

Харин Хөдөлмөр, нийгмийн хамгааллын яаманд ёстой ажлын төлөө төрчихсөн хүн гэгддэг С.Чинзоригийг тавих нь яалт ч үгүй зөв сонголт болох нь. Өмнө нь Нийгмийн хамгаалал, хөдөлмөрийн дэд сайд, Монгол Улсын Ерөнхийлөгчийн Тамгын газрын дэд дарга, Хөдөлмөрийн сайд зэрэг албыг хашихдаа Монгол Улсад, тэр дундаа нийгэм хамгаалал, хөдөлмөрийн салбарт олон зөв бодлогыг хэрэгжүүлсэн түүнд энэ албыг хариуцуулах нь тун оновчтой болохыг салбарынхан нь ч ярьж эхэлжээ.

Түүнчлэн Сангийн яамыг сайн эдийн засагчид, Эрүүл мэндийн яамыг тухайн салбарт ажиллаж байсан эмч, мэргэжилтнүүд, эрүүл мэндийн салбарыг сайн мэддэг хүнд өгөх нь зүйтэй гэдгийг ч дамжуулж байгааг энэ дашрамд дуулгачихъя.  

Дашрамд дуулгахад, Засгийн газрыг энэ долоо хоногтоо багтаан байгуулах сурагтай байгаа юм. Тиймээс хэлсэндээ хүрч, олныхоо үгийг сонсч, мэргэжлийн хүмүүсээр л сайд нараа бүрдүүлээрэй дээ МАН-ынхаан.