Өчигдрийн УИХ-ын чуулганы нэгдсэн хуралдаанаар Уур амьсгалын өөрчлөлтийн тухай НҮБ-ын суурь конвенцийн Парисын хэлэлцээрийг соёрхон батлах тухай хуулийн төслийг /Засгийн газар 2016.08.23-ны өдөр өргөн мэдүүлсэн, соёрхон батлах/ хэлэлцэж баталсан юм.

Хууль санаачлагч УИХ-ын гишүүн, Байгаль орчин, аялал жуулчлалын сайд Д.Оюунхорол хуулийн төслийг танилцуулсаны дараа УИХ-ын гишүүн Д.Лүндээжанцан, Д.Тэрбишдагва, Ж.Бат-Эрдэнэ, Ж.Энхбаяр нар асуулт асууж, санал хэлсэн юм.

УИХ-ын гишүүн Ж.Энхбаяр:

“Хуулийн төслийг баталснаар Байгаль орчин, аялал жуулчлалын яамны чиг үүрэг эрс нэмэгдэнэ. Конвенцийн 7 дугаар бүлэгт зааснаар Уур амьсгалын өөрчлөлтөд дасан зохицох нөөц төлөвлөгөө, стратеги боловсруулах, энэ хүрээнд бүх салбарын уялдаа холбоог сайжруулах үүргийг Монгол Улс хүлээж байна. Тиймээс ч Уур амьсгалын өөрчлөлтөд дасан зохицох стратегийг яаралтай боловсруулж, УИХ-д танилцуулж батлуулах шаардлагатай байна” гээд ирээдүйд хүн амын төвлөрөл, шилжилт хөдөлгөөн ихсэх магадлалтай бүс нутгуудад одооноос стратегийн шинжтэй бодлого баримтлах, уул уурхайн олборлолтыг зохистой түвшинд авч явах нь зүйтэй гэсэн санал хэллээ.

Мөн тэрээр Монгол орны эко систем эмзэг хийгээд байгаль орчинд тулгамдсан, нэн яаралтай шийдвэрлэх шаардлагатай Улаанбаатар хотын ундны усны нөөц, голын ай сав, бэлчээрийн даац зэрэг олон чухал асуудлыг энэ үеэр хөндсөн юм.

Ж.Энхбаяр: Яамны чиг үүрэг эрс нэмэгдэнэ