2017 оны хоёрдугаар сарын эхний УИХ-ын чуулганы хуралдаан /2017.02.02, 2017.02.03/-аар 27 асуудал хэлэлцэнэ.

Үүнээс 6 нь нэр бүхий хуулийн төслүүдийн эцсийн хэлэлцүүлэг, 7 хуулийн төслийн анхны хэлэлцүүлэг, 3 УИХ-ын тогтоолын төслийн анхны хэлэлцүүлэг, 6 хуулийн төслийн хэлэлцэх эсэх, 1 тогтоолын төслийн хэлэлцэх эсэх, Ерөнхийлөгч болон Ерөнхий сайдын мэдээлэл, Үндсэн хуулийн цэцсийн дүгнэлт байх юм.

Эдгээрээс онцлон эцсийн хэлэлцүүлэг хийх буюу батлагдах магадлалтай зургаан хуулийн төслийг танилцуулж байна.  

1. Насны хишиг олгох тухай асуудлыг эцэслэн батлах буюу "Ахмад настны тухай" шинэчилсэн найруулгын төслийн эцсийн хэлэлцүүлгийг хийх юм. Ингэснээр 65 ба түүнээс дээш насны ахмад настанд жилд 2 удаа 50-250 мянган төгрөгийн насны хишгийг олгох бөгөөд энэ арга хэмжээнд зориулан Монгол Улсын 2017 оны төсвийн тухай хуульд 20,4 тэрбум төгрөгийг суулгасан билээ.

2. МАН-ын 2016 оны УИХ-ын сонгуулийн мөрийн хөтөлбөрт, Хүүхэд төрүүлсэн ээжүүдэд даатгуулсан хэлбэрээс нь үл хамааран хөдөлмөрийн хөлснөөс адил хувиар тооцон тэтгэмж олгох, хүүхдээ 3 нас хүртэл асарч байгаа эхчүүдийн НДШ төлсөн хугацаа тасрахгүй байх, төрүүлж, өсгөсөн хүүхдийн тоогоор эхийн ажилласан хугацааг 1,5 жилээр нэмэгдүүлэн тооцох, малчдын тэтгэврийн насыг 5 жилээр наашлуулна гэж заасан байдаг.

Тэгвэл энэ амлалтыг хэрэгжилтийг хангах зорилготой “Нийгмийн даатгалын сангаас олгох тэтгэвэр, тэтгэмжийн тухай хуульд нэмэлт өөрчлөлт оруулах тухай” хуулийн төслийг эцэслэн батлах юм. Уг хуулийн төслийг УИХ-ын гишүүн С.Чинзориг санаачлан өргөн мэдүүлсэн.

3. Түүний боловсруулсан өөр нэг хуулийн төсөл энэ долоо хоногт батлагдахаар байна. Энэ бол “Малчин, хувиараа хөдөлмөр эрхлэгчийн тэтгэврийн даатгалын шимтгэлийг нөхөн төлүүлэх тухай” хуулийн төсөл юм.

Хуулийн төсөл батлагдсанаар манай улсын ДНБ-ий 10 хувийг үйлдвэрлэж буй 300 гаруй мянган малчин, 240 мянга гаруй хувиараа хөдөлмөр эрхлэгчид 1990-1995 оны ажиллаагүй тасалдсан хугацааг ажилласнаар нөхөн тооцож, 1995-2000 оны тэтгэврийн даатгалын шимтгэлийг нөхөн төлөх боломжтой болно.

4. Энэ долоо хоногт батлагдах дараагийн хуулийн төсөл бол Монгол Улсын Ерөнхийлөгчийн өргөн мэдүүлсэн “Гамшгаас хамгаалах тухай хуулийн шинэчилсэн найруулгын төсөл” юм. Уг хуулийн төсөлд гамшгаас хамгаалах удирдлагын тогтолцоо, эрх үүргийг нарийвчлах, гамшгийн өмнө, гамшгийн үед, гамшгийн дараах нөхцөлд хэрхэн ажиллах, албан хаагчдын нийгмийн баталгааг хангах талаар тусгасан байна.

Хуулийн төслийг УИХ-ын чуулганы нэгдсэн хуралдаанд хэлэлцүүлэх бэлтгэл ажлыг хангах үүрэг бүхий ажлын хэсгийн ахлагчаар Ж.Энхбаяр ажилласан бөгөөд өнгөрсөн хугацаанд ажлын хэсэг нэг удаа, ажлын дэд хэсэг дөрвөн удаа хуралджээ.

5. УИХ-ын гишүүн Ж.Ганбаатар нарын 8 гишүүн өнгөрсөн оны сүүлд өргөн мэдүүлсэн Гаалийн албан татвараас чөлөөлөх тухай хуульд өөрчлөлт оруулах тухай хуулийн төслийн эцсийн хэлэлцүүлгийг хийнэ.

6. Энэ долоо хоногийн хэлэлцэх асуудлын жагсаалтад "Аж ахуйн нэгжийн орлогын албан татварын тухай хуульд нэмэлт, өөрчлөлт оруулах тухай" хуулийн төслийн эцсийн хэлэлцүүлгийг хийхээр болсон нь сонирхол татаж байна.

Засгийн газрын 2016 оны 9 дүгээр сарын 30-ны өдөр өргөн мэдүүлсэн уг хуулийн төслийг хууль санаачлагчид нь буцаасан боловч яг энэ нэр, агуулгаараа хэлэлцэх асуудлын жагсаалтад багтсан байх юм.

Тодруулбал, Жилийн борлуулалтын орлого нь 1,5 тэрбум төгрөгөөс ихгүй, хүнсний үйлдвэрлэл, хувцас болон нэхмэлийн үйлдвэрлэл, барилгын материалын үйлдвэрлэл, газар тариалан, мал аж ахуйн үйлдвэрлэлийн чиглэлийн үйл ажиллагаа явуулж байгаа албан татвар төлөгчийн үндсэн үйл ажиллагааны орлогод 2017 оны 1 дүгээр сарын 1-ний өдрөөс 2021 оны 1 дүгээр сарын 1-ний өдрийг хүртэл хугацаанд 1 хувиар албан татвар ногдуулахаар буюу ногдуулсан татварыг 30 хувиар хөнгөлөхөөр хуулийн төсөлд тусгасан байдаг.