Чинзориг.С 2018.03.21 | Сайт: Vip76.mn

УИХ-ын гишүүн С.Чинзориг тойрогтоо ажиллаж байна

УИХ-ын гишүүн С.Чинзориг Өвөрхангай аймгийн 21-р тойргоос сонгогдсон.  Тэрээр сар шинийн өмнөөс эхлээд тойргийнхоо сумдаараа явж иргэдтэйгээ уулзаж байгаа. Энэ удаа зүүн талын буюу Бүрд, Есөнзүйл, Өлзийт, Баян-Өндөр суманд ажиллаж байна.

С.Чинзориг гишүүн уулзалтаа Бүрд сумаас эхэлсэн.  Сумын иргэд уулзалтанд идэвхитэй оролцож Соёлын төвийн суудал хүрэлцэхгүй болсон байсан юм.

Гишүүн сонгогч олондоо УИХ-ын намрын чуулганаар баталсан хууль тогтоомжийг сурталчлах, Засгийн газрын үйл ажиллагааны талаар танилцуулж, иргэдийн санаа бодол, санал хүсэлтийг нь сонсч, сонирхсон асуултанд нь хариуллаа.

Бүрд сумын иргэд уулзалтанд идэвхитэй оролцлоо

Бүрд сумынхан гишүүнээс нутгийн хилийн цэсийг баталгаажуулахад анхаарахыг хүслээ.

1986 оны АИХ-ын тогтоолоор Бүрд сумын нутгийн цэсийг тогтоосон байдаг ч жил ирэх тусам хэдэн талаасаа шахагдаад үе удмаараа нутаглаж ирсэн өвөлжөө хаваржаа нь өөр аймаг, сумын нутаг болж байгаа талаар иргэд  хэлж байсан.

Мөн Бүрд сумынхан  энэ өвлийн зуднаар нутгийн олондоо зориулан хөрөнгө мөнгө цуглуулж өвс, тэжээл, бензин шатахуун гээд олон зүйлээр сэтгэл харамгүй тусалсан нутгийн зөвлөлийн гишүүн болон Нийслэлд суугаа нутаг нэгтнүүддээ талархал илэрхийлж байлаа.

Дараа нь С.Чинзориг гишүүн Өвөлжилт хүндэрсэн сумдын нэг болох Есөнзүйл суманд ажилласан.

Цас ихтэй байснаас оторт олон айл явсан ч малын хорогдол их гарч, малчид нэлээд зутруухан өвөлжсөн байна. Одоогоор 11 мянга орчим мал хорогдоод байгаа гэсэн тоог сумын удирдлагууд уулзалтын үеэр хэлж байсан юм.

Есөнзүйл суманд өвөлжилт хүндхэн болсон

 

Мөн Есөнзүйлийнхэн адууныхаа бараг 40 хувийг алдсан, голдуу бага шүдлэнгээс доош насны малаа алдчихаад эрэл сурал болж байгаа тухайгаа малчид ярьж байсан юм.

Суманд даатгалын байгууллагын төлөөлөл байдаггүй нь малчидын даатгалд хамрагдах боломжийг хязгаарлаж, хүндрэл учруулж байгаа асуудлын нэг болж байна.

Есөн зүйл суманд 11 мянга орчим мал хорогдсон

 

Малчид цаг наашилж, урин дулаан болохтой зэрэгцээд үхсэн малынхаа сэг зэмийг устгах том ажил гарч байгаа гэдгийг хэлж байсан. Тус сумын хувьд сайжруулсан замтай болох асуудлыг тавьдаг. Гэхдээ нутгийн иргэд энэ удаа ковштой трактортай болчихвол замаас гадна цасанд боогдсон машин тэргээ гаргах, сумын төвийнхөө хогийг түрэх гээд олон ажлыг өөрсдийн хүчээр хийх боломжтой болно гэсэн санал хэлж байлаа.

Уулзалтын үеэр тойргийн иргэдийн дийлэнх нь тэтгэвэр тэтгэмж, тэтгэврийн нас, нийгмийн даатгалын шимтгэлтэй холбоотой олон асуулт асууж, хариулт авсан. Ялангуяа малчдын тэтгэврийн насыг наашлуулсан хууль батлагдсанд талархаж байгаа.

Гэхдээ тэтгэврээ тогтоолгоход хүндрэл учирч байгаа талаар малчид ярьж байсан.

УИХ-ын гишүүн С.Чинзориг тойрогтоо ажиллаж байна

УИХ-ын гишүүн С.Чинзориг уулзалтын үеэрээ чуулганы завсарлагаар тойрогтоо ажиллаж иргэдэд төрийн бодлого шийдвэр, батлагдсан хууль тогтоомжийг сурталчлан таниулахын хамт иргэдийн санаа бодлыг сонсч төр, иргэний хооронд гүүр болох үүрэгтэй.

Энэ үүргээ ямагт хариуцлагатайгаар биелүүлэхийг хичээж ирсэн бөгөөд сонгогдсоноосоо хойш тойргийнхоо 12 сумаар тус бүр 4-5 удаа очиж ажилласан гэдгийг сонгогчиддоо дуулгаж байсан юм.

Сэтгүүлч

Vip76.mn Ц.Соёлмаа