Оюутолгой, Эрдэнэтийн хэрэгтэй холбоотой асуудлаар зарим хүмүүсийг саатуулан шалгаж эхлээд байгаа. Тэгвэл энэ асуудлыг улс төржүүлэхгүйгээр, бодитой шийдвэрлэж, буруутай эрхэмүүдэд хариуцлага тооцох хэрэгтэй гэж УИХ-ын гишүүд хэлж байна.

УИХ-ын гишүүн Л.Оюун-Эрдэнэ: Өмнөх практикаас харвал сүр дуулиан болоод хэдэн хүн баригддаг. Дараа нь янз бүрийн өвчний шалтгаанаар суллагддаг. Ийм л жишгээр явж ирсэн. Эрх зүйт төр гэж байдаг бол гэм буруутай нь тогтоогдсон хэн ч болов хуулийн өмнө хариуцлага хүлээх ёстой.

УИХ-ын гишүүн Д.Тэрбишдагва: Нам дамжсан олигархууд, Олон улсын эдийн засгийн алуурчдын гар хөл орсон хэрэг юм. Маш олон зөрчил, алдаанууд гарсан.

УИХ-ын гишүүн Б. Бат-эрдэнэ: Хууль хяналтын байгууллага өөрсдийнхөө хийх ёстой зүйлийг хийж байгаа гэж бодож байгаа. Бидэнд хардах эрх нь бий. 2008 оноос хойш энэ улсуудтай холбоотой асуудлыг ярьж, удаа дараа шаардаж байсан.

УИХ-ын гишүүн Ч.Улаан: Шударга ёс гэж байдаг бол улс орныхоо хууль дүрмийг хэрхэн хэрэгжүүлсэн гэдэгт ул суурьтай, үнэн зөв дүгнэлт өгөх байх. Төрийн байгууллага бол хууль тогтоомжийн хэрэгжилт хийгээд Монголын ард түмний эрх ашгийг хамгаалах ёстой.

Оюутолгой, Эрдэнэтийн хэрэгтэй холбоотой асуудлыг улс төржүүлэхгүй шалгахыг санууллаа