Б.Энх-Амгалан 2018.06.19

Хан-Уул дүүргийн Өлзийт хороололд 240 хүүхдийн цэцэрлэгийн барилгын ажил эхэллээ

Хан-Уул дүүргийн Өлзийт хороололд 240 хүүхдийн цэцэрлэгийн барилгын ажил эхэллээ

Хан-Уул дүүргийн ХIV  хороо буюу Өлзийт хороололд 240 хүүхдийн цэцэрлэгийн  шав тавих ёслол өнөөдөр /2018.06.19/-нд боллоо.

Ёслолын ажиллагаанд УИХ-ын гишүүн Б.Энх-Амгалан, Нийслэлийн боловсролын газрын санхүү хөрөнгө оруулалт, төлөвлөлтийн хэлтсийн дарга Ж.Энхтөр, Хан-Уул дүүргийн Засаг даргын орлогч Г.Батсайхан, Хан-Уул дүүргийн Боловсролын хэлтсийн дарга Ж.Отгонхорлоо болон цэцэрлэгийн хамт олон эцэг, эхчүүдийн төлөөлөл оролцов.  

Тодруулбал,  тус цэцэрлэгийн барилгын ажлыг улсын төсвийн 1.8 тэрбум төгрөгийн хөрөнгө оруулалтаар хийж, 2019 оны наймдугаар сард ашиглалтад хүлээлгэн өгөх юм.

УИХ-ын гишүүн Б.Энх-Амгалан “Улсын төсвийн хөрөнгөөр Боловсролын салбарт хийж байгаа энэ жилийн хамгийн эхний ажил бол энэ 240 хүүхдийн  цэцэрлэгийн бүтээн байгуулалтын ажил юм. Улсын төсөвт энэ жил 850 сая төгрөг суусан. Дараа жилийн төсөвт нэг тэрбум төгрөг сууснаар шинэ цэцэрлэг үйл ажиллагаагаа эхэлнэ. Нийслэлийн хэмжээнд сургууль, цэцэрлэгийн хүртээмжгүй байгаа энэ цаг дор Өлзийт хороолол томоохон хэмжээний цэцэрлэгтэй болох эхлэл тавигдаж байгаа нь олон талын ач тустай. Мөн энд удахгүй 150 ортой эмнэлгийн барилгын ажил эхэлнэ. Бүтээн байгуулалтын хугацаа  зуны гурван сар байдаг учраас барилгын компаниуд нэлээд шахуу ажиллах байх. Эхлүүлсэн ажлаа хугацаанд нь хүлээлгэж өгнө гэдэгт итгэлтэй байна. Мөн уг хороонд тохижилтын ажлыг цөөнгүй хийнэ. Тухайлбал, гэрэлтүүлэг хийхээр 35 сая төгрөг төсөвлөсөн, цэцэрлэгт хүрээлэнг хашаажуулах зэрэг ажлыг хийж гүйцэтгэнэ. Өнгөрсөн жил хүчдэлийн уналттай айл өрхийн асуудлыг шийдсэн” гэв.

Хан-Уул дүүргийн ХIV хороо цэцэрлэгийн насны 680 хүүхэдтэй. Үүнээс тал хувь нь буюу 300 гаруй хүүхэд цэцэрлэгт хамрагддаг. Ийнхүү 240 хүүхдийн цэцэрлэг ашиглалтад орсноор тус хорооны цэцэрлэгийн насны хүүхэд 100 хувь хамрагдах боломж бүрдэж байгааг дүүргийн удирдлагууд онцолсон юм. 

Түүнчлэн Хан-Уул дүүргийн Засаг дарга Ж.Алдаржавхлан УИХ-ын гишүүн Б.Энх-Амгалан болон бусад холбогдох албаны хүмүүсд Хан-Уул дүүрэгт 2018 онд хийгдэх хөрөнгө оруулалт, бүтээн байгуулалтын ажлыг танилцууллаа. Мөн 2019 онд дүүрэгт хэрэгжүүлэх төсөл, арга хэмжээний саналыг уламжилж албан ёсоор хүлээлгэн өгсөн үйл ажиллагаа болж өндөрлөлөө. 

Сэтгүүлч

Vip76.mn О.Батзаяа batzaya@vip76.mn