Ажлын цаг дууссанаас хойш дэлгүүр хэсэх, өглөө эрт цай кофе уух газаргүй, "унтаа хот"-ын иргэдэд нэг ч таатай мэдээ дуулгая.

Нийслэлийн хамгийн олон хүн амтай дүүргийн нэг болох Сонгинохайрханчууд өнгөрсөн долоо хоногт "Өглөөний гудамж"-тай болсон билээ. Иргэдэд хүрэх төрийн үйлчилгээг ойртуулах, ажлын цагаар авч амжихгүй байгаа үйлчилгээгээ ажилдаа явах замдаа авах боломжийг бүрдүүлэх зорилгоор дүүргийн Засаг дарга Ж.Сандагсүрэнгийн санаачилгаар уг ажлыг эхлүүлсэн. Ингэснээр иргэд Засаг даргын Тамгын газар, Улсын бүртгэлийн хэлтэс, Нийгмийн даатгалын хэлтэс, Татварын алба, Газрын алба, Хөдөлмөр, халамж үйлчилгээний хэлтэс, Эрүүл мэндийн төв, Спорт хороо зэрэг байгууллагаас өглөө эрт үйлчилгээ авч эхэлсэн. Мөн арилжааны банкууд болон үүрэн холбооны оператууд ч тус бүрийнхээ үйлчилгээг үзүүлж байна. Энэ талаар Өглөөний гудамжийг санаачлагч Засаг дарга Ж.Сандагсүрэн " Амжилтад хүрсэн хүмүүс эрт босохын ид шидийн талаар маш их ярьдаг. Гэтэл өнөөдөр хотод маань 06.00 цагт онгойдог газар маш ховор байна. Нээлтээ хийсэн "Өглөөний гудамж" маань ирэх есдүгээр сар өнгөртөл өглөө 06.00-09.00 цагт иргэдэд нээлттэй. Мөн таныг өглөөний цай кофегоор дайлахаас гадна шатар даам тоглох, морин хуур, гитар хөгжмийн сургалтад сууж, хөдөлгөөний дутагдлаас сэргийлэх дасгал хөдөлгөөн хийх, хүмүүсийн амжилтын нууцаас хуваалцах, дүүргийн холбогдох албан тушаалтнуудтай уулзаж санал бодлоо солилцох боломжийг олгож байна. Ажилдаа явахаасаа өмнө төрөөс үзүүлдэг төрөл бүрийн үйлчилгээнд хамрагдаж ажлаа шуурхай амжуулаарай" гэсэн юм.

Эрт босох дадлыг төлөвшүүлэх зорилготой "Өглөөний гудамж"-ийг есдүгээр сар хүтэл ажилуулах бөгөөд амралтын өдрүүд болон нийтээр тэмдэглэн өнгөрүүлэх баярын өдрүүдэд амрах юм байна.