Тэрбишдагва.Д 2018.10.10 | medee.mn

Д.Тэрбишдагва: Томоохон хөрөнгө оруулагчдын санхүүгийн гүйлгээг Монголбанкаар дамжуулах нь зохисгүй

Д.Тэрбишдагва: Томоохон хөрөнгө оруулагчдын санхүүгийн гүйлгээг Монголбанкаар дамжуулах нь зохисгүй

УИХ-ын Эдийн засгийн байнгын хорооны өчигдрийн хуралдаанаар хоёр асуудлыг хэлэлцэн шийдвэрлэв. Тодруулбал, Валютын зохицуулалтын тухай хуулийн төсөл болон хамт өргөн мэдүүлсэн бусад хуулийн төслийн хэлэлцэх эсэхийг хэлэлцээд дэмжсэн юм. 

Хэлэлцэж буй асуудалтай холбогдуулан УИХ-ын гишүүн Д.Тэрбишдагва “Хуулийн төслөөр валютын зах зээл дэх шийдвэрлэх шаардлагатай асуудлуудыг бүрэн шийдэх боломж бий юу. Гадаадын томоохон хөрөнгө оруулагчид дотоодын банкны системээр санхүүгийн гүйлгээгээ явуулах асуудлыг хуульчлан тусгасан уу. Томоохон хөрөнгө оруулагчдын санхүүгийн гүйлгээг Монгол банкаар дамжуулах асуудал нь зохисгүй гэж үзэж байна. Үүний оронд арилжааны банкуудаа чадавхжуулан, томоохон хөрөнгө оруулагчдын санхүүгийн гүйлгээг найдвартай гүйцэтгэх нөхцөлийг бүрдүүлэхэд анхаарах нь зүйтэй” гэж хэлсэн юм.

Түүний асуултад Монголбанкнаас “Манай улсын хувьд эрэлт, нийлүүлэлтээсээ үүдэн валютын ханш тогтох зохицуулалттай хэдий ч огцом савлагаатай үед Төв банкнаас оролцох асуудлыг төсөлд тусгасан. Монгол Улсад нэвтрүүлэх болон гадагш авч гарах бэлэн валютын хэмжээний хязгаарлалт холбогдох эрх зүйн баримт бичгийн хүрээнд зохицуулагдаж байдаг. Төсөлд шинээр тусгагдсан зүйл нь макро зохистой бодлогын хүрээнд эдийн засагт орох, гарах огцом урсгал үүсэх юм бол олон улсад байдаг жишгийн дагуу тодорхой хязгаар тогтоох бололцоог нээж байгаа гэв.

Т.ЭНХЭЛЭЭ