Хүссэн хүүхэд бүрд хүүхдийн мөнгө олгох талаар Нийгмийн хамгаалал хөдөлмөрийн сайд С.Чинзоригоос тодрууллаа.

-Ерөнхий сайд хүсэлт гаргасан хүүхэд бүрд хүүхдийн мөнгө олгох үүргийг өгсөн. Төсөв мөнгийг нь хаанаас гаргах вэ?

-2019 оны төсвийг батлахдаа УИХ 40 дүгээр тогтоол гаргасан. Энэ тогтоолоор нийт хүүхдийн 80 хувьд нь хүүхдийн мөнгө олгох чиглэл өгсөн.

Мөн цаашдаа хүүхдийн мөнгө олгох хамрах хүрээг нэмэгдүүлэхтэй холбоотойгоор хүсэлт гаргасан өрхийн хүүхдэд мөнгөн тэтгэмж олгох чиглэлээр судалгаа хийх, үүнд шаардагдах хөрөнгийн эх үүсвэрийг олон улсын байгууллагуудтай зөвшилцөж, энэ арга хэмжээг хэрэгжүүлэх тогтоол гаргасан.

Тогтоолын дагуу манай яамны харъя Хөдөлмөр халамж үйлчилгээний газар хүүхдийн мөнгөн тэтгэмж авах хүсэлтэй өрхийн судалгааг гаргасан. Энэ судалгаагаар нийт хүүхдийн 85 хувь нь буюу нэг сая хүүхэд хүүхдийн мөнгөн тэтгэмж авах хүсэлтээ өгсөн гэсэн судалгаа гарсан. Нэгэнт энэ судалгааг хийсэн учраас Ерөнхий сайд Хүүхдийн төлөө үндэсний зөвлөл дээр хүсэлтээ гаргасан хүүхдүүдэд мөнгөн тэтгэмжийг зургадугаар сарын 1-нээс олгох чиглэл өгсөн.

-Хэдий хэмжээний санхүүжилт шаардлагатай вэ?

-Одоо 912 мянган хүүхэд хүүхдийн мөнгөн тэтгэмж авч байгаа. Хүсэлт гаргасан хүүхдүүдэд олгохоор бол 88 мянган хүүхэд нэмэгдэж хамрагдана гэсэн үг. Эдгээр хүүхдэд зургадугаар сарын 1-нээс олгоно гэхээр сүүлийн долоон сар мөнгөн тэтгэмж олгоход 17 тэрбум төгрөг нэмж шаардана. Энэ мөнгийг энэ жилийн төсөвтөө багтаан олгох бүрэн боломжтой гэж Сангийн яам манай яам хоёр үзэж байгаа. Тиймээс энэ асуудлыг энэ долоо хоногийн Засгийн газрын хуралдаанд оруулж, тодорхой чиглэл гаргана.

-Зургадугаар сарын 1-нээс олгож амжих уу?

-Хүсэлт гаргасан өрхийн 88 мянган хүүхдэд хүүхдийн мөнгө олгох боломжтой. Материал нь бүрдсэн. Хөрөнгийн эх үүсвэр байгаа. Нийгмийн хамгаалал хөдөлмөрийн сайдын энэ жилийн батлагдсан төсөвт хөрөнгө багтаагаад хэрэгжүүлэх боломжтой гэж үзсэн. Тиймээс хөрөнгө мөнгөн дээр ямар нэгэн асуудал үүсэхгүй.

-Ерөнхий сайдыг чиглэл өгсний дагуу иргэд хүүхдийн мөнгө авах хүсэлтээ илэрхийлсэн боловч дахин өрхийн амьжиргааны төвшинг тогтооно гэсэн байна. Тэгэхээр дахиж энэ судалгааг хийх юм уу?

-Одоо бол айлуудаас дахиж өрхийн амьжиргааны судалгаа авахгүй. Манайд энэ судалгаанд хамрагдсан нэг сая 44 мянган хүүхэд байна. Энэ хүүхдүүдээс 670 гэсэн босго онооноос доош оноотой нэг сая хүүхдэд хүүхдийн мөнгө олгоно. Тэгэхээр дахиж судалгаа хийхгүй. Өнгөрсөн жил хүүхдийн мөнгө авах хүсэлтээ айл өрхүүд өгсөн. Тэр материал дээр тулгуурлаад л олгоно.

сэтгүүлч Л.Одончимэг

С.Чинзориг: Өнгөрсөн жил хүсэлт гаргасан хүүхдүүдэд л хүүхдийн мөнгө олгоно