Нийгмийн бодлого, боловсрол, соёл, шинжлэх ухааны байнгын хороо хуралдаанаар 2018 оны улсын төсвийн гүйцэтгэлийг хоёрдугаар хэлэлцүүлгийг хийсэн. Хэлэлцүүлгийн явцад гишүүүд тэтгэврийн зээлийн хүүгийн талаар ХНХ-ын сайд С.Чинзоригоос асуулт асууж, хариулт авлаа.

УИХ-ын гишүүн М.Оюунчимэг: Тэтгэврийн зээлийн хүүг энэ сараас буурууллаа гэж байгаа. Яагаад гарсан шийдвэр хэрэгжих ёстой шатан дээрээ гацаад байна вэ. Олон нийтэд худлаа мэдээлэл тараад байгаа юм шиг ойлголт хүрээд байна. Өнөөдөр 223 мянган ахмадуудын 71 хувь нь тэтгэврийн зээлтэй байна.

ХНХ-ын сайд С.Чинзориг: Тэтгэврийн зээлийн хүүг үе шаттай бууруулах арга хэмжээ авч байна. Тэтгэврийн зээлийн 24 сартай буюу хоёр жилийн хугацаатай нь 18 хувийн хүүтэй байсан. энэ сарын 1-нээс эхлээд зээлийн хүүг 15.6 хувьд, ирэх оны нэгдүгээр сараас эхлээд 13 хувийн хүүтэй болгохоор ярьж байна. Гэхдээ зээлийн хүүгийн бууралт өмнө нь авсан зээлд хамаарахгүй. Цалин, тэтгэвэр гэдэг тухайн өрхийн сарын орлого болохоос банкны барьцаа биш. Тиймээс хугацааг нь уртасгах, нөхцөлийг нь хөнгөвчлөх асуудлыг тавьсан.

УИХ-ын гишүүн М.Оюунчимэг: Шинээр тэтгэврийн зээл авах хүн байхгүй байгаа. 230 мянган тэтгэвэр авагч л энэ асуудлыг хүлээж байгаа гэдгийг анхаарч арга хэмжээ авах тал дээр бодолцоорой.

ХНХ-ын сайд С.Чинзориг: Тэтгэвэр барьцаалсан зээлийг Засгийн газар юм уу, Нийгмийн даалтгалын газар шийдэхгүй. Арилжааны банкны үйл ажиллагаа. Арилжааны банкны зээлийн хүүгийн асуудалд оролцох эрхгүй. Энэ сарын 1-нээс Төрийн банк хоёр жилийн хугацаатай тэтгэврийн зээлийг хүүг 15.6 хувийн олгож эхэлсэн бол өнөөдрөөс Хаан банкинд хэрэгжиж эхлэх юм байна.

Бага хүүтэй зээлийг зөвхөн 12 сар хүртэлх хугацаагаар тэтгэврийн зээл авч буй ахмадуудад олгож байсан учраас тэтгэвэр авагчдаас урт хугацаатай зээлийн хүүг бууруулах хүсэлтийг удаа дараа гаргажээ. Иргэдээс ирсэн хүсэлтийг харгалзан энэ сарын 1-нээс эхлэн 18 хувийн хүүтэй олгож байсан зээлийн хүүг 15.6 хувь болгон бууруулахаар болжээ. 2020 оны нэгдүгээр сараас зээлийн хүүг дахин 13 хувь болгохоор арилжааны банкуудтай харилцан тохиролцоод байгаа аж.

Манай улсад нийт 417 мянган иргэн тэтгэвэр авч байгаагийн 56 хувь нь буюу 230 мянган иргэн тэтгэврийн зээл аваад буй бөгөөд нийт зээлийн хэмжээ нь 844 тэрбум төгрөг байгаа юм байна.

С.Чинзориг: Тэтгэврийн зээлийн хүүгийн бууралт өмнөх зээлд хамаарахгүй