УИХ-ын чуулганы өнөөдрийн (2019.10.04) нэгдсэн хуралдаанаар Д.Ганзоригийг Зэвсэгт хүчний Жанжин штабын даргаар томилох эсэх асуудлыг хэлэлцлээ.

Зэвсэгт хүчний Жанжин штабын даргаар ажиллаж байсан А.Ганбат үүрэгт ажлаасаа өөрийн хүсэлтээр чөлөөлөгдсөн тул Монгол Улсын Ерөнхийлөгч хуульд заасан бүрэн эрхийнхээ хүрээнд Довчинсүрэнгийн Ганзоригийг Зэвсэгт хүчний Жанжин штабын даргаар томилох асуудлыг зөвшилцөх тухай албан бичгийг 2019 оны 10 дугаар сарын 01-ний өдөр Улсын Их Хуралд хүргүүлсэн. 

Зэвсэгт хүчний Жанжин штабын даргаар томилох асуудалтай холбоотойгоор УИХ-ын гишүүд асуулт асууж, үг хэллээ. 

УИХ-ын гишүүн О.Баасанхүү:

"Дайн дажингүй, энхийн тайван цагт цэргийн албан хаагч яагаад нас бараад байна вэ? мэдээлэл их гарч байна. Энэ асуудлыг хэрхэн шийдэх вэ?

Монгол Улс нэгдмэл, тусгаар тогтносон, бүрэн эрхт улс. төрийн эрхийг хууль бусаар авахыг завдах... Завдах гэдгийг хуулийн эсрэг зохион байгуулалттай үйл ажиллагаа гэж ойлгодог. Гэтэл сүүлийн үед ХМХ-ээр "Цэргийн нэгдсэн холбоо" гэдэг хамгийн улс төржих ёсгүй мөрдөстэй хүмүүс улс төрийн холбоонд нэгдэх ёстой байдаг юм уу? Энгийн иргэд байж болно. Гэтэл засаг дарга нар нэгдсэн холбооны дарга гэж гүйцэтгэх албан тушаалтай хүн. Засаг дарга нь аймаг хотын цэргийн анги нэгтгэлийн цэрэг татах ажлыг гардаг гүйцэтгэдэг. Гэтэл тэд холбооны тэргүүн, буутай зэвсэгтэй залуусыг цуглуулж цэргийн зохион байгуулалтын үйл ажиллагаа хийж байгаа нь хуулийн дагуу юу? Иргэний дайн бэлдээд байгаа юм уу?

Ерөнхийлөгчийн дор фронт байгуулсан байна. Генералууд тэр дунд нь сууж байна. Энэ хууль ёсных уу? хэрвээ болох бол би аль нэг талд нь орж үр хүүхдээ ч хамгаалья. Иргэний дайн болвол яах вэ? Ерөнхийлөгч нь бүх цэргийн командлагч хэрнээ иргэний хөдөлгөөнүүдтэй нийлээд араас нь турхираад байна гэж би харж байна. Үгүй бол иймэрхүү зүйлийг таслан зогсоох хэрэгтэй. Төрийн ордонд хүртэл цэргийнхнийг авчраад л. Айлгаад байгаа юм уу? Ийм замбараагүй байдлыг та юу гэж харж байна вэ?"